BAKI, 26 may. TELEQRAF

"Ukrayna Silahlı Qüvvələri yay hücumuna hazırlaşır və Qərb mətbuatında Ukrayna qoşunlarının guya ağır vəziyyətdə olduğu ilə bağlı yayılan xəbərlər, bu hazırlıqları yalnız təsdiqləyir".

Teleqraf xəbər verir ki, bu barədə Moskva Şəhər Dumasının (MCD) deputatı və jurnalist Andrey Medvedev teleqramda məlumat verib.

Medvedev Ukrayna bölmələri arasında əhval-ruhiyyənin aşağı düşməsi, döyüş sursatı və canlı qüvvə çatışmazlığından bəhs edən xəbərlərin ortaya çıxmasını, Ukraynanın əks-hücum hazırlığını ört-basdır edən "tüstü pərdəsi" olaraq qiymətləndirib.

Onun sözlərinə görə, bu cür xəbərlər, Ukraynanın hücuma keçəcəyini gizlətmək üçün aparılan taktiki bir manevrdir.

"Bəli, mən ekspertlərimizdən eşitdim ki, Ukrayna Silahlı Qüvvələrinin hücum etməyə gücü yoxdur. Lakin 2023-cü ilin yayında eyni ekspertlərdən, Ukrayna Silahlı Qüvvələrinin hücuma keçməyəcəyini də eşitdim. Ona görə də Qərb mətbuatında yayılan kütləvi kədər bizi çaşdırmamalıdır", - deyə o bildirib.