BAKI, 21 aprel. TELEQRAF
İsveç, Finlandiya, Danimarka və Norveç ABŞ-dən asılılığı azaltmaq məqsədilə hərbi resurslarını birləşdirərək regional təhlükəsizlik sahəsində daha sıx əməkdaşlığa başlayıblar.
Teleqraf xəbər verir ki, "The Wall Street Journal" qəzetinin ekspertlərə istinadən verdiyi məlumata görə, bu dörd Şimali Avropa ölkəsi birgə hərbi güclərini birləşdirərək yeni bir regional təhlükəsizlik arxitekturası yaratmağı hədəfləyir.
İsveç, sualtı qayıqlar, tanklar və yüksək sürətli döyüş təyyarələri istehsal edərkən, Norveç dənizdə müşahidə və Arktikada döyüş imkanlarını gücləndirir. Finlandiya isə Avropanın ən böyük daimi ordusuna və artilleriyasına sahibdir. Danimarka isə Əfqanıstan və İraqda təcrübə qazanmış xüsusi təyinatlılara malikdir.
ABŞ kəşfiyyatının keçmiş baş analitiki Erik Ciaramella bu regional birləşmənin iqtisadi və hərbi resurs potensialı baxımından Almaniya kimi inteqrasiya olunmuş hərbi sənaye bazası yaratmaq imkanı verdiyini vurğulayıb. Eyni zamanda, Finlandiya Beynəlxalq Münasibətlər İnstitutunun baş elmi işçisi Matti Pesu bu əməkdaşlığın digər ölkələr üçün nümunə ola biləcəyini qeyd edib.
O, ABŞ Prezidenti Donald Trampın NATO-dan çıxma təhdidini xatırladaraq, belə bir birləşmənin NATO-nun işə yaramaması halında ehtiyat planı kimi nəzərdə tutulduğunu bildirib.
