BAKI, 2 aprel. TELEQRAF

Ufanın "Ay Yola" qrupu bütün dünya üzrə "Shazam" platformasında yeddinci yeri tutaraq Ledi Qaqa və Kendrik Lamarın hitlərini qabaqlayıb.

Teleqraf xəbər verir ki, "Homay" mahnısı ahəngdarlığına görə bütün dünyada məşhurlaşıb.

Mahnı başqırd dastanının "Ural-batır" personajı Homaya həsr olunub.

Dastanda Homay Samrau adlı kralının qızı kimi təqdim edilir və qəhrəman Ural-Batırın həyat yoldaşıdır. O, Ural-Batırın mübarizələrində mühüm rol oynayır və ona dəstək olur.

Homay obrazı qədim türklərin inanclarında ev, ana, ailə və uşağın simvolu olan Umay (yaxud Humay) ilahəsi ilə əlaqələndirilir. Umay türk mifologiyasında doğum və uşaqların hamisi sayılan ilahədir. O, hamilə qadınları və uşaqları qoruyur, bərəkət və rifah gətirir.

Mahnının sözlərində Homayın mənşəyi və xüsusiyyətləri vurğulanır. Tərcümədə deyilir ki, Homayın anası Günəşdir və onu canlı suyu olan bulaqda çimizdirib, atası Samrau isə ona xeyirxahlığı öyrədib. Bu təsvirlər Homayın ilahi və müdrik bir varlıq olduğuna işarədir.

Mahnıda adı çəkilən Akbuzat adlı qanadlı at və almaz qılınc kimi simvollar da türk mifologiyasına aiddir. Akbuzat "Ural-Batır" dastanında Ural-Batırın minərək qəhrəmanlıq göstərdiyi qanadlı atdır.

Mahnının sevilməsinin əsas səbəblərindən biri də elə onun türklərin ortaq dəyərlərini təbliğ etməsidir.