BAKI, 27 avqust. TELEQRAF
ABŞ senatoru Riçard Blumental Rusiyaya qarşı “cəhənnəm sanksiyaları”nın gələn ay qəbul ediləcəyinə ümid edir.
Teleqraf xəbər verir ki, bu barədə “Reuters” məlumat yayıb.
Blumental mərhum senator Lindsi Qremlə birlikdə qanun layihəsinin həmmüəllifidir. O, Nümayəndələr Palatasının qanun layihəsini sentyabr ayında qəbul edəcəyinə və bu qanunun Rusiya Prezidenti Vladimir Putinin Ukraynadakı müharibəni maliyyələşdirmək cəhdlərinə güclü zərbə vuracağına ümid edir. Senator bildirib ki, qanun layihəsi Nümayəndələr Palatasında respublikaçılar arasında güclü dəstəyə malikdir.
“Putin yalnız güc dilini başa düşür. Rusiyaya qarşı sanksiyalar Putinin başa düşdüyü gücə malik toxmaqdır”, - Blumental bildirib.
Demokratlar ümumilikdə sanksiyaları dəstəkləsələr də, onların bəziləri bunun Prezident Donald Trampa əlavə tariflər, o cümlədən ABŞ-nin müttəfiqlərinə qarşı rüsumlar tətbiq etmək üçün geniş imkanlar verəcəyindən narahat olduqlarını deyiblər.
Blumentalın sözlərinə görə, qanun layihəsində nəzərdə tutulan istisnalar Avropadakı müttəfiqlərin əlavə tariflərə məruz qalmasının qarşısını alacaq, bununla da bəzi demokratların ifadə etdiyi narahatlıqları aradan qaldıracaq.
Senator Ukrayna Prezidenti Volodimir Zelenskidən Nümayəndələr Palatasının üzvlərinə qanun layihəsinin qəbulunu dəstəkləmələri üçün təzyiq göstərməsini xahiş edib. Ötən ay Zelenski Lindsi Qremin dəfn mərasiminin keçirildiyi gün qanun layihəsi üzrə səsvermədən əvvəl Vaşinqtonda bir neçə senatorla görüşüb. Blumental əlavə edib ki, Zelenski onun xahişini məmnuniyyətlə və tərəddüd etmədən qəbul edib.
