BAKI, 7 oktyabr. TELEQRAF

“Dünyada baş verən münaqişələr yüz minlərlə insanın taleyinin naməlum qalmasına, ailə və icmaların dərin iztirablar yaşamasına səbəb olub. Latın Amerikasından Balkanlara, Qafqaza, daha yaxın dövrdə isə Ukrayna, Qəzza və Sudana qədər itkin şəxslər münaqişələrin ağrılı nəticəsi olaraq qalır”.

Teleqraf xəbər verir ki, bu sözləri Türkiyə Böyük Millət Məclisinin üzvü, keçmiş xarici işlər naziri Mövlud Çavuşoğlu Bakı Dialoqu çərçivəsində keçirilən İtkin düşmüş şəxslər üzrə IV Beynəlxalq Konfransda çıxışı zamanı deyib.

M.Çavuşoğlu vurğulayıb ki, itkin şəxslər məsələsi əməkdaşlıq, etimad və peşəkarlıqla yanaşı, hər şeydən əvvəl dərin humanitar məqsədə siyasi bağlılıq tələb edir:

"Humanitar aspekt bütün səylərimizin mərkəzində qalmalıdır. Ailələr üçün zamanın keçməsi sağalma gətirmir, cavablar gətirir. 1990-cı illərin əvvəllərindən etibarən itkin düşmüş 4 minə yaxın Azərbaycan vətəndaşının taleyi mühüm humanitar problem olaraq qalır. Onların arasında qadınlar, ahıl şəxslər və uşaqlar da daxil olmaqla dinc sakinlər var".

Türkiyəli siyasətçi regiondakı sülh prosesinə də toxunaraq bildirib:

"Bu gün Prezident İlham Əliyevin liderliyi sayəsində Cənubi Qafqazda davamlı sülh perspektivi heç vaxt olmadığı qədər realdır. Azərbaycanla Ermənistan arasında sülh sazişi mətnində itkin şəxslərə dair müddəanın yer alması bu məsələnin daha geniş sülh prosesinin tərkib hissəsi kimi qəbul edildiyini göstərən mühüm amildir".