BAKI, 5 iyun. TELEQRAF

Müasir beynəlxalq münasibətlər sistemində müxtəlif regionlarda davam edən müharibə və silahlı münaqişələr təkcə həmin ölkələrin deyil, digər dövlətlərin vətəndaşları üçün də ciddi təhlükələr yaradır. Son dövrlərdə xarici ölkələrdə baş verən münaqişələrdə Azərbaycan vətəndaşlarının həlak olması ilə bağlı xəbərlər cəmiyyətdə geniş müzakirələrə səbəb olur. Bu məsələyə dövlətçilik maraqları və milli təhlükəsizlik baxımından yanaşmaq xüsusi əhəmiyyət kəsb edir.

Bunu Teleqraf-a açıqlamasında Milli Məclisin deputatı Vasif Qafarov deyib.

O qeyd edib ki, xarici münaqişələrdə həyatını itirən Azərbaycan vətəndaşlarının həmin proseslərdə iştirakı dövlət siyasətinin və ya rəsmi dövlət xəttinin nəticəsi deyil.

"Onlar fərdi qərar əsasında, könüllü şəkildə müxtəlif fəaliyyətlərə qoşulurlar. Bu baxımdan, onların fəaliyyəti Azərbaycan dövlətinin mövqeyini və ya maraqlarını təmsil etmir.

Digər mühüm məqam xaricdə çalışan və yaşayan azərbaycanlıların təhlükəsizliyi ilə bağlıdır. Müharibə və silahlı toqquşmaların baş verdiyi ərazilərdə hüquqi və fiziki təhlükəsizlik zəmanətləri minimum səviyyəyə enir. Belə şəraitdə nə yerli hakimiyyət orqanları, nə də beynəlxalq təşkilatlar fərdlərin təhlükəsizliyini tam təmin edə bilirlər. Buna görə də Azərbaycan vətəndaşlarının münaqişə zonalarından uzaq durması, riskli bölgələrə səfərlərdən çəkinməsi həm şəxsi təhlükəsizlik, həm də dövlətin öz vətəndaşlarını qorumaq siyasəti baxımından vacibdir.

Dövlətçilik nöqteyi-nəzərindən xarici münaqişələrdə iştirakın başqa riskləri də mövcuddur. Müxtəlif silahlı qruplar və ya xarici hərbi birləşmələr tərkibində fəaliyyət göstərmək gələcəkdə hüquqi, siyasi və təhlükəsizlik problemləri yarada bilər. Belə hallar Azərbaycanın beynəlxalq imicinə mənfi təsir göstərə, həmçinin ölkənin təhlükəsizlik maraqları ilə bağlı əlavə çağırışlar formalaşdıra bilər. Dövlətin əsas məqsədi vətəndaşlarının xarici münaqişələrə cəlb olunmasının qarşısını almaq, onların qanuni fəaliyyət sahələrində çalışmasını və təhlükəsiz həyat sürməsini təmin etməkdir".

O həmçinin bildirib ki, xarici münaqişələrdə həlak olan həmvətənlərimizlə bağlı xəbərlər onların ailələri üçün ağır mənəvi itki olmaqla yanaşı, bütövlükdə cəmiyyət tərəfindən də kədər və narahatlıqla qarşılanır.

"Hər bir insan itkisi milli insan kapitalının azalması deməkdir. Buna görə də vətəndaşların emosional və ya ideoloji təsirlər altında xarici münaqişələrə qoşulması nə fərdi, nə də ictimai maraqlara xidmət edir.

Ümumilikdə, dövlət maraqları tələb edir ki, Azərbaycan vətəndaşları xarici münaqişələrdən uzaq dursun, müharibə zonalarına səfər etməkdən və ya silahlı qarşıdurmaların iştirakçısına çevrilməkdən çəkinsinlər. Azərbaycan dövlətinin prioriteti sülh, sabitlik, vətəndaşların təhlükəsizliyi və milli maraqların qorunmasıdır. Bu prinsiplərə uyğun davranış həm fərdlərin həyatının qorunmasına, həm də ölkənin uzunmüddətli milli maraqlarının təmin olunmasına xidmət edir".