BAKI, 3 aprel. TELEQRAF

“Üzgüçülüyün hər bir sahəsi üzrə ayrıca inkişaf planı hazırlamağı düşünürük. Azərbaycanda su idman növlərinin hər bir sahəsində inkişafa nail olmaq istəyirik”.

Teleqraf xəbər verir ki, bu sözləri jurnalistlərə açıqlamasında Azərbaycan Üzgüçülük Federasiyasının prezidenti Zaur Əliyev deyib.

Qurum rəhbəri Bakıda səfərdə olan Avropa Su İdmanı Növləri Federasiyasının prezidenti Antoniu Silva ilə keçirdikləri görüşün detallarından danışıb: “Görüş zamanı Azərbaycanda su idman növlərinin inkişafı ilə bağlı gələcəkdə hansı işləri birgə görə bilərik və hansı əməkdaşlıqları birgə edə biləcəyimizi müzakirə etdik. Görüş zamanı Gənclər və İdman Nazirliyinin strategiyasına uyğun idmanın inkişafının yollarından bəhs etdik. Su idman növləri ilə bağlı da müzakirələr apardıq. Bu barədə növbəti 10 ildə görəcəyimiz işlər barədə danışdıq. Azərbaycanda üzgüçülüyü inkişaf etdirmək istəyiriksə, məqsədlərimizdən biri də kütləviliyin artırılmasıdır. Yəni gəncləri məktəb yaşlarından su idman növlərinə cəlb etmək yollarını tapmalıyıq. Bununla bağlı müzakirələr apardıq. Xaricdə olan bir çox metodları Azərbaycanda da tətbiq etmək istəyirik. Gənclər və İdman Nazirliyi bununla bağlı bir çox layihələr həyata keçirir. Çox gözəl haldır ki, məktəblərdə uşaqların üzgüçülük dərslərində iştirak etməsinə şərait yaradılır. Daha çox məktəbliyə onların dərs saatlarına mane olmadan üzmə bacarıqlarını öyrətmək istəyirik. Buna nail olsaq, əminəm ki, həmin uşaqlar arasında potensialı olanlar aşkar ediləcək və Azərbaycanı beynəlxalq arenada uğurla təmsil edəcəklər”.

Federasiya rəhbəri milli komandanın iştirak edəcəyi əsas yarışdan da söz açıb: “Bu ilin yayında Sinqapurda dünya çempionatı təşkil olunacaq. Artıq üzgüçülərimizdən 2-si lisenziya qazanıb. Bu yaxınlarda da bir yarış olacaq, inanırıq ki, digər idmançılarımızın lisenziya qazanmaq imkanı var. Ümid edirik ki, digər idmançılarımız da yarışda iştirak etmək üçün lisenziya əldə edə biləcəklər”.