BAKI, 6 iyul. TELEQRAF

Futbol üzrə dünya çempionatının 1/8 final mərhələsində keçiriləcək Meksika – İngiltərə qarşılaşmasının başlanğıcı əlverişsiz hava şəraiti səbəbindən təxirə salına bilər.

Teleqraf xəbər verir ki, bu barədə "The Sun" nəşri məlumat yayıb.

Məlumata görə, oyuna bir neçə saat qalmış Mexikodakı "Astek" stadionunun yerləşdiyi ərazidə güclü tufan və ildırım müşahidə olunub. Təhlükəsizlik məqsədilə stadion əməkdaşları azarkeşlərin, jurnalistlərin və futbolçuların arenaya daxil olmasına hələlik icazə vermirlər.

Qarşılaşmanın yerli vaxtla nəzərdə tutulan qrafik üzrə keçirilməsi planlaşdırılır. Lakin tufan saat 02:30-dək səngiməzsə, oyunun startının ən azı 30 dəqiqə gecikdiriləcəyi bildirilir.

Məlumata əsasən, daha əvvəl hər iki komandaya görüşün altı saat daha erkən keçirilməsi təklif olunsa da, Meksika və İngiltərə milliləri bu variantı qəbul etməyiblər.

Qeyd edək ki, Meksika və İngiltərə yığmaları dünya çempionatının 1/8 final mərhələsində üz-üzə gələcəklər.