BAKI, 18 noyabr. TELEQRAF

Bu tədris ilində Bakıda daha 12 ümumi təhsil müəssisəsində inklüziv siniflər yaradılıb. Bu sıraya 21, 26, 56, 68, 112, 227, 238, 253, 259, 263, 276 və 314 nömrəli tam orta məktəblər daxildir.

Bu barədə Teleqraf-a Bakı Şəhəri üzrə Təhsil İdarəsindən məlumat verilib.

Bildirilib ki, hazırda Bakı şəhəri üzrə ümumilikdə 53 təhsil müəssisəsində sağlamlıq imkanları məhdud uşaqlar inklüziv təhsilə cəlb edilib.

İnklüziv təhsil sağlamlıq imkanları qismən məhdud uşaqlarla sağlam uşaqların eyni sinifdə təhsil almasına imkan yaradır. Layihə həmin uşaqların cəmiyyətə daha rahat inteqrasiyasına nail olmaq məqsədlərinə xidmət edir. İnklüziv təhsilin əsas hədəfi uşaqların təkcə sosiallaşması deyil, eyni zamanda keyfiyyətli təhsil almasıdır.

Qeyd edək ki, 2015-ci ildən başlayaraq Elm və Təhsil Nazirliyi tərəfindən ölkəmizdə inklüziv təhsilin inkişafı istiqamətində pilot layihələr həyata keçirilir, tənzimləyici hüquqi-normativ sənədlər təkmilləşdirilir və müəllim hazırlığı üzrə proqramlar yenilənir.