BAKI, 4 aprel. TELEQRAF
ABŞ Prezidenti Donald Trampın Ermənistandan idxal olunan mallara 10 faizlik gömrük rüsumu tətbiq etməsinin ciddi nəticələri olacaq.
Teleqraf xəbər verir ki, bu barədə Ermənistanda nəşr olunan “Past” qəzeti yazır.
“Tramp dünən dünyanın bütün ölkələrinə tariflər tətbiq edib, Ermənistan üçün bu, 10 faiz civarındadır. Bu isə o deməkdir ki, ABŞ-yə tədarük edilən erməni mallarının qiyməti ən azı 10 faiz artacaq, erməni iş adamları ciddi itkilərə məruz qalacaq. Amerikalılar artıq bahalı erməni mallarını almayacaqlar.
Ermənistan Dövlət Gəlirləri Komitəsinin məlumatına görə, ölkədən ABŞ-yə ixrac edilən əsas məhsullar spirtli içkilər, süd məhsulları, tərəvəz konservləri, su, siqaret, qiymətli daşlar və sairdir. Statistika Komitəsinin məlumatına görə, 2024-cü ildə Ermənistan ABŞ-yə 60 milyon dollar dəyərində mal ixrac edib. İkitərəfli ticarət dövriyyəsi 410 milyon dollar olub. ABŞ Ticarət Departamentinin məlumatına görə, ötən il Ermənistandan idxal 121 milyon dollara çatıb”, - nəşr qeyd edir.
“Past” bildirir ki, ilk və əsas zərbə ucuz qiymətə görə ABŞ-də rəqabətədavamlı olan erməni brendlərinə dəyəcək:
“Qiymət artımından sonra çoxları Amerika viskisi və burbonuna üstünlük verəcək, (erməni) konyak istehlakı isə azalacaq. Əlbəttə, yenə də satılacaq, amma Amerikada yaşayan ermənilərin sayəsində. Ümumilikdə, nəticələr ciddi olacaq”.
