BAKI, 3 aprel. TELEQRAF
Çin nümayəndə heyəti Bakıda Cənubi Qafqaz regionunda “Bir Kəmər, Bir Yol” təşəbbüsünün genişləndirilməsi və inkişafı məsələsini müzakirə edib, amma Zəngəzur dəhlizi məsələsini qaldırmayıb.
Teleqraf xəbər verir ki, bunu Çinin Ermənistandakı müvəqqəti işlər vəkili Çen Min İrəvanda jurnalistlərə açıqlamasında deyib.
Onun sözlərinə görə, bu barədə mediada yayılan məlumatlar həqiqəti əks etdirmir.
Çen Min əlavə edib ki, həm Azərbaycan, həm də Ermənistan Çinin dost tərəfdaşlarıdır:
“Pekin hesab edir ki, tərəflər fikir ayrılıqlarını siyasi dialoq və diplomatiya yolu ilə həll etməyə çalışmalıdır.
Cənubi Qafqaz da daxil olmaqla, irəli sürdüyümüz “Bir Kəmər, Bir Yol” təşəbbüsü bölgədə sülhün bərqərar olması üçün çox vacibdir. Həmçinin Çin regionda hər bir ölkənin seçdiyi inkişaf yoluna hörmətlə yanaşır. Çin tərəfi ölkələrin daxili işlərinə qarışmayacaq”.
Xatırladaq ki, Çin Kommunist Partiyası Mərkəzi Komitəsinin üzvü, beynəlxalq əlaqələr şöbəsinin müdiri Lü Tzyançaonun rəhbərlik etdiyi nümayəndə heyəti dünən Azərbaycanda səfərdə olub.
