BAKI, 31 yanvar. TELEQRAF

“Avropa ABŞ üçün böyük geostrateji əhəmiyyətə malikdir və Amerikanın NATO-dan çıxmaq istəyinə dair heç bir əlamət yoxdur”.

Teleqraf xəbər verir ki, bunu Almaniya müdafiə naziri Boris Pistorius deyib.

“Amerikalıların Avropaya ehtiyacı olduğu kimi, avropalıların da amerikalılara ehtiyacı var. Avropa Vaşinqton üçün geostrateji və geoiqtisadi əhəmiyyətlidir. NATO daxilində ortaq məxrəcin olduğuna əminəm”, - nazir bildirib.

Almaniya müdafiə naziri Avropa dövlətlərini Donald Tramp administrasiyası ilə münasibətlərinə daha çox inam göstərməyə çağırıb. Pistorius xəbərdarlıq edib ki, Ağ Evə boa ilanına baxan dovşan kimi baxmaq səhvdir. Müdafiə naziri ABŞ Prezidenti Donald Trampın məqsədlərinə çatmaq üçün qeyri-müəyyənlik və qorxuya güvəndiyini iddia edib.

“Qorxanlar səhv qərarlar verirlər. Buna görə də, biz hədə-qorxuya uymayacağıq. Biz avropalılar tədricən ənənəvi müdafiəmizə nəzarəti ələ alırıq. ABŞ onilliklərdir bu məsuliyyəti əsasən öz üzərinə götürüb. ABŞ hətta yeni müdafiə strategiyasında belə nüvə çətirini şübhə altına almır”, - o vurğulayıb.