BAKI, 24 avqust. TELEQRAF

Qazaxıstan Prezidenti Kasım-Jomart Tokayev Milli Təhlükəsizlik Komitəsinin, Milli Bankın, Ali Məhkəmə Şurasının rəhbərlərini, həmçinin İnsan Hüquqları üzrə Müvəkkili vəzifələrində saxlayıb.

Teleqraf xəbər verir ki, dövlət başçısı bununla bağlı müvafiq sərəncamlar imzalayıb.

Milli Banka Timur Süleymenov rəhbərlik etməyə davam edəcək. O, bu vəzifəni 2023-cü ildən tutur. Yermek Saqimbayev isə Milli Təhlükəsizlik Komitəsinin sədri olaraq qalacaq, o, xüsusi xidmət orqanına 2022-ci ildən rəhbərlik edir.

Dmitri Malaxov Ali Məhkəmə Şurasının sədri vəzifəsini qoruyub. O, bu vəzifədə 2024-cü ildən çalışır.

Tokayev həmçinin Artur Lastayevi İnsan Hüquqları üzrə Müvəkkil vəzifəsinə yenidən təyin edib. Lastayev bu vəzifəni 2022-ci ildən tutur.

Təyinatlar 2026-cı ildə referendumla qəbul edilmiş yeni Konstitusiyaya uyğun olaraq həyata keçirilib. Yeni Konstitusiya iyulun 1-də qüvvəyə minib və keçid müddəalarına əsasən bir sıra əsas dövlət vəzifələrinə yeni təyinatlar tələb olunurdu. Konstitusiya Məhkəməsi də əvvəlki Konstitusiya dövründə həmin vəzifələrdə çalışmış şəxslərin yeni Konstitusiya qüvvəyə mindikdən sonra yenidən təyin olunmasına imkan verib.

Bundan əvvəl Tokayev Baş prokuror Berik Asılovu və Ali Məhkəmənin sədri Aslanbek Merqaliyevi də vəzifələrində saxlamışdı. Beləliklə, yeni Konstitusiyanın keçid müddəalarında nəzərdə tutulan əsas vəzifələrin hamısında əvvəlki şəxslər qalıb.