BAKI, 12 oktyabr. TELEQRAF

Arxeoloqlar Misirin İsgəndəriyyə şəhərinin sahillərində, Aralıq dənizinin dibində qədim “dünyanın yeddi möcüzəsi”ndən biri olan İsgəndəriyyə mayakının təsvir edildiyi tunc üzük tapıblar.

Teleqraf xəbər verir ki, bu barədə “Live Science” məlumat yayıb.

Tədqiqatçıların sözlərinə görə, bu, üzərində həmin mayakın təsviri olan ilk belə tapıntıdır.

Artefakt Antirodos sualtı adasında yerləşən sarayın xarabalıqlarında aşkarlanıb. Qazıntılar Avropa Sualtı Arxeologiya İnstitutu və Misirin Turizm və Qədim Abidələr Nazirliyinin birgə ekspedisiyası tərəfindən aparılıb.

Faros kimi də tanınan İsgəndəriyyə mayakı e.ə. III əsrdə İsgəndəriyyə limanının girişində yerləşən Faros adasında inşa edilib. Bu, dənizçilər üçün “kompas” rolunu oynayıb və antik dövrün ən məşhur mühəndislik qurğularından biri hesab edilir. Uzun əsrlər boyu mayak şəhərin simvollarından biri olaraq qalsa da, zəlzələlər nəticəsində dağılıb.

Üzüyün tapıldığı Antirodos adası qədim dövrlərdə İsgəndəriyyə limanında yerləşib. Burada Ellinistik Misir hökmdarları ilə əlaqəli saray tikililəri mövcud olub. Sonralar ada su altında qalıb, memarlıq qalıqları isə sualtı arxeoloji tədqiqatların obyektinə çevrilib.

Üzərində təsvir olan möhür üzüyü məşhur tarixi abidənin əks etdirilməsi baxımından tədqiqatçılar üçün xüsusi maraq doğurur. Belə zinət əşyaları yalnız bəzək məqsədilə deyil, həm də sənədlər və digər materiallar üzərində möhür izi qoymaq üçün istifadə edilə bilərdi.

Arxeoloqların fikrincə, bu tapıntı İsgəndəriyyə mayakının qədim dövrlərdə necə qəbul edildiyi və şəhər sakinləri, eləcə də onun qonaqları üçün hansı əhəmiyyət daşıdığı barədə təsəvvürləri genişləndirir.

Üzüyün dəqiq tarixi və sahibinin kimliyi ilə bağlı qeyd yoxdur.