BAKI, 25 may. TELEQRAF
İranla danışıqlar yaxşı gedir.
Teleqraf xəbər verir ki, bunu ABŞ Prezidenti Donald Tramp bildirib.
Ağ Ev rəhbəri mayın 23-də Səudiyyə Ərəbistanı, BƏƏ, Qətər, Pakistan, Türkiyə, Misir, İordaniya və Bəhreyn liderləri, eləcə də yüksək vəzifəli rəsmilərlə apardığı müzakirələrdən danışıb.
Tramp qeyd edib ki, ABŞ-nin bu mürəkkəb geosiyasi məsələnin həlli istiqamətində gördüyü işlərdən sonra adıçəkilən ölkələrin eyni vaxtda İbrahim Sazişlərinə qoşulması vacibdir.
“Bu saziş ya hamı üçün möhtəşəm olacaq, ya da ümumiyyətlə baş tutmayacaq. Əks halda, yenidən döyüş meydanlarına və qarşıdurmalara qayıdacağıq. Bunu isə heç kim istəmir”, - o deyib.
ABŞ Prezidenti vurğulayıb ki, BƏƏ və Bəhreyn artıq sazişin iştirakçısıdır, ilk Səudiyyə Ərəbistanı və Qətər qoşulmalı, digər ölkələr də onları izləməlidir.
Donald Tramp əlavə edib ki, müəyyən səbəblərə görə bir və ya iki ölkənin imtinası qəbul oluna bilər, amma digərlərinin bu tarixi addımı atmağa hazır olması gözlənilir: “Şərtləri qəbul etməyən ölkələr səmimi niyyət nümayiş etdirməmiş olacaq və İranla bağlanacaq yekun sazişdən kənarda qalacaqlar”.
Amerika lideri vurğulayıb ki, İbrahim Sazişləri mövcud münaqişələr dövründə belə üzv ölkələr – BƏƏ, Bəhreyn, Mərakeş, Sudan və Qazaxıstan üçün ciddi maddi, iqtisadi və sosial üstünlüklər yaradıb.
O qeyd edib ki, region liderləri ilə aparılan müzakirələrdə İranın da bu sazişə daxil olması məsələsi gündəmə gəlib: “Əgər İran mənimlə – ABŞ Prezidenti kimi saziş imzalasa, onun da bu koalisiyanın bir hissəsi olması bizim üçün şərəf olardı”.
Tramp nümayəndələrinə sözügedən ölkələrin İbrahim Sazişlərinə qoşulması prosesinə başlamaq və prosesi uğurla yekunlaşdırmaq barədə göstəriş verdiyini açıqlayıb.
