BAKI, 2 aprel. TELEQRAF
ABŞ müdafiə naziri Pit Heqset Yəməndə iki həftədən çox davam edən bombardman kampaniyası və İranla gərginliyin artması fonunda Yaxın Şərqə əlavə döyüş təyyarələri göndərməyi əmr edib.
Teleqraf xəbər verir ki, bu barədə “Reuters” məlumat yayıb.
Pentaqonun qısa bəyanatında bölgədə hansı təyyarələrin harada yerləşdiriləcəyi dəqiqləşdirilməyib.
Bununla belə, adının açıqlanmasını istəməyən ABŞ rəsmilərinin sözlərinə görə, son bir həftə ərzində Hind okeanının Dieqo Qarsiya adasındakı ABŞ-Britaniya hərbi bazasına 6 ədəd B-2 bombardmançı təyyarəsi yerləşdirilib.
Mütəxəssislər deyirlər ki, gizli texnologiya ilə təchiz edilmiş və Amerikanın ən güclü bombasını - 30 min funtluq GBU-57-ni və nüvə silahlarını daşımağa qadir olan B-2 Yaxın Şərqdə əməliyyatlar üçün ən ideal silahdır.
Pentaqonun sözçüsü Şon Parnell deyib: “İran və ya onun proksi qüvvələri Amerika personalı və regiondakı maraqlarını təhdid edərsə, Birləşmiş Ştatlar xalqımızı qorumaq üçün qəti addımlar atacaq”.
ABŞ Strateji Komandanlığı Dieqo Qarsiyaya nə qədər B-2-nin göndərildiyini söyləməkdən imtina edib və B-2-lərin iştirakı ilə təlim və ya əməliyyatlara dair şərh vermədiyini bildirib.
Nəşr yazır ki, ABŞ Hərbi Hava Qüvvələrinin xidmətində cəmi 20 B-2 bombardmançı təyyarəsi var, ona görə də bunlardan adətən az istifadə olunur. Amerikalı analitiklər hesab edirlər ki, B-2-lərdən İranın nüvə obyektlərinə zərbə vurmaq üçün istifadə oluna bilər.
