BAKI, 21 sentyabr. TELEQRAF

Ağır psixi sağlamlıq problemləri olan yetkin şəxslərin ümumi əhali ilə müqayisədə 75 yaşına çatmadan ciddi fiziki xəstəliklərdən ölmə ehtimalı təxminən 5 dəfə yüksəkdir.

Teleqraf xəbər verir ki, bu barədə “The Guardian” Böyük Britaniyanın Milli Səhiyyə Xidmətinin (NHS) məlumatlarının “Rethink Mental Illness” xeyriyyə təşkilatı tərəfindən aparılmış təhlilinə istinadən yazıb.

Araşdırmaya əsasən, ağır psixi sağlamlıq problemləri olan insanlar ümumi yetkin əhali ilə müqayisədə orta hesabla 15-20 il daha az yaşayırlar. Erkən ölümlərin böyük hissəsi qarşısı alına bilən fiziki xəstəliklərlə əlaqələndirilir.

Hesablamalara görə, 75 yaşdan aşağı ağır psixi sağlamlıq problemləri olan şəxslərin qaraciyər xəstəliklərindən ölüm riski 6,3 dəfə, tənəffüs sistemi xəstəliklərindən 6 dəfə, ürək-damar xəstəliklərindən 3,8 dəfə, xərçəngdən isə 2,3 dəfə yüksəkdir.

2022-2024-cü illərdə İngiltərədə 18-74 yaşlı ağır psixi sağlamlıq problemləri olan şəxslər arasında ölümlərin 56,5 faizi xərçəng, ürək-damar, qaraciyər və tənəffüs sistemi xəstəliklərinin payına düşüb.

Mütəxəssislər yüksək ölüm göstəricilərinin səbəbləri sırasında yoxsulluq, pis mənzil şəraiti, siqaret çəkmə, bəzi dərmanların səbəb olduğu çəki artımı, fiziki hərəkətsizlik və tibbi xidmətlər arasında koordinasiyanın zəifliyini göstərirlər.

Hesabatda həmçinin fiziki simptomların yanlış olaraq psixi xəstəliklə əlaqələndirilməsi səbəbindən bəzi xəstəliklərin vaxtında araşdırılmadığı və müalicə edilmədiyi vurğulanır.