Hakimlər Komitəsi “Real”ın əleyhinə səhv qərar verildiyini etiraf edib

BAKI, 21 sentyabr. TELEQRAF

İspaniya Hakimlər Texniki Komitəsi La Liqada “Real” və “Atletiko” arasında keçirilən matçda hakim səhvinə yol verildiyi qənaətinə gəlib.

Teleqraf xəbər verir ki, bu barədə İspaniyanın “AS” nəşri məlumat yayıb.

Komitənin mövqeyinə görə, “Atletiko”nun futbolçusu Li Kan İn birinci hissənin sonlarında “Real”ın kapitanı Federiko Valverdeyə qarşı kobud sürüşmə fəndinə görə birbaşa qırmızı vərəqə almalı idi.

Qeyd edək ki, qarşılaşma “Atletiko”nun 2:1 hesablı qələbəsi ilə yekunlaşıb. Oyundan sonra “Real”ın baş məşqçisi Joze Mourinyo hakimin Li Kan İnə və Kristian Romeroya qırmızı vərəqə göstərməməsindən narazılığını bildirib.

Komitə Li Kan İnlə bağlı qərarın yanlış olduğunu bildirsə də, “Real”ın müdafiəçisi Din Höysenin meydandan qovulmasını və Kristian Romeroya qırmızı vərəqə göstərilməməsini düzgün hesab edib.

Hazırda “Atletiko” 16 xalla turnir cədvəlində ikinci, “Real” isə 15 xalla dördüncü pillədə qərarlaşıb.