“Hazırda dünyada Prezident İlham Əliyev Azərbaycanın ərazi bütövlüyünü təmin edən, suverenliyini bərpa edən və milli maraqlarını müdafiə edən güclü bir lider kimi qəbul edilir. Bu, onun beynəlxalq hüquqa əsaslanaraq mürəkkəb ərazi mübahisələrini həll edə bilən bir siyasətçi kimi beynəlxalq imicini formalaşdırıb. Xüsusilə bu, 2020 və 2023-cü il hadisələrindən sonra beynəlxalq səviyyədə yüksək qiymətləndirilir”.

Teleqraf xəbər verir ki, bunu açıqlamasında Milli Məclisin komitə sədri, professor Hicran Hüseynova bildirib.

Komitə sədri qeyd edib ki, Prezident İlham Əliyevin siyasəti daxili sabitliyə, ölkənin inkişafına və Azərbaycanın mühüm regional oyunçu kimi tanınmasına yönəlib və dövlət başçısının qətiyyət, iradə, prinsipiallıq, alicənablıq kimi keyfiyyətləri bu strateji məqsədlərə çatmaq üçün əsas hesab olunur:

“Alman dövlət xadimi Otto fon Bismarkın bir fikrini qeyd etmək istərdim. O deyirdi ki: "Bir millətin taleyi onun liderinin xarakteri ilə müəyyən edilir". Azərbaycan üçün bu tezis mücərrəd deyil, praktikdir. Mürəkkəb regional və qlobal mühitdə dövlətimizə siyasətin davamlılığını, daxili sabitliyi və milli maraqların ardıcıl qorunmasını təmin etməyi bacaran bir lider - Prezident İlham Əliyev rəhbərlik edir.

Dövlət strategiyasını müəyyən edən bütün bu göstəricilərin beynəlxalq səviyyədə yüksək qiymətləndirilməsi sevindirici haldır. Bunun bariz nümunəsi Birləşmiş Ərəb Əmirliklərinin (BƏƏ) nüfuzlu Şeyx Zayed Fondu tərəfindən 2026-cı il İnsan Qardaşlığı üzrə Zayed Mükafatının Azərbaycan Prezidentinə verilməsidir. Xüsusilə diqqətəlayiqdir ki, Fondun rəsmi saytında yerləşdirilən məlumatda bu mükafatın Qafqazda onilliklər boyu davam edən münaqişələrə və humanitar əzablara son qoyan "Azərbaycan Respublikası ilə Ermənistan Respublikası arasında Sülhün Qurulması və Dövlətlərarası Münasibətlər haqqında Saziş"in paraflanmasına görə verildiyi vurğulanır.

İnsan Qardaşlığı üzrə Zayed Mükafatı münsiflər heyətinin üzvü və mükafatın baş katibi Məhəmməd Əbdülsəlamın vurğuladığı kimi, "Bu il İnsan Qardaşlığı üzrə Zayed Mükafatı Komitəsi Ermənistan və Azərbaycan arasında tarixi sülh müqaviləsini seçdi. Bu müqavilə mükafatın dialoq və birgəyaşayış mədəniyyətinin təşviqi və inkişaf etdirilməsi missiyasını və məqsədlərini təcəssüm etdirir. Bu, qlobal sülhün inkişafında mühüm mərhələ və böyük diplomatik nailiyyət hesab olunur". Bu qiymətləndirməyə yalnız əlavə etmək olar ki, bu nüfuzlu mükafat təkcə Prezident İlham Əliyevin şəxsi liderlik keyfiyyətlərini əks etdirmir, həm də münaqişədən sonrakı dövrdə Azərbaycan dövləti tərəfindən hazırlanmış sülh gündəliyinin qlobal miqyasda tanındığını nümayiş etdirir”.

Professor bildirib ki, 2020-ci ilin payızında Vətən müharibəsində qalib gələn və 2023-cü ilin sentyabrında bir günlük antiterror əməliyyatını uğurla həyata keçirən Azərbaycan ərazi bütövlüyünü və suverenliyini tam şəkildə bərpa etdi və dünyaya ən uzun müddətdir davam edən ərazi mübahisələrinin belə beynəlxalq hüququn norma və prinsipləri əsasında həll edilə biləcəyini açıq şəkildə nümayiş etdirdi:

“Bütün bunlar birlikdə Azərbaycan dövlətinin həm əməkdaşlıq mühitinin yaradılması üçün ilkin şərtlərin yaradıldığı Cənubi Qafqaz regionunda, həm də qlobal miqyasda mövqeyini gücləndirdi.

Sonrakı dövrdə rəsmi Bakı sülh və təhlükəsizliyə yönəlmiş sülh gündəliyini məqsədyönlü şəkildə irəli sürdü. Bu yolda ölkəmiz Ermənistanda revanşist əhval-ruhiyyəsini alovlandırmağa və Cənubi Qafqazda yeni gərginlik ocaqları yaratmağa çalışan qüvvələrin misli görünməmiş təzyiqi ilə üzləşdi. Yalnız güclü siyasi iradəyə malik xarizmatik lider bu təzyiqə müqavimət göstərə bilərdi. Və Prezident İlham Əliyev bu missiyanı parlaq şəkildə yerinə yetirdi.

Prezident İlham Əliyev bəyan etdiyi mövqelərdən bir an və ya bir addım da olsun yayınmadan beynəlxalq səviyyədə Bakının sülh gündəliyinin fundamental prinsiplərini ardıcıl olaraq müdafiə etdi. Bu, məntiqi olaraq 8 avqust 2025-ci ildə Azərbaycan və Ermənistan xarici işlər nazirləri tərəfindən iki ölkə liderlərinin və dünyanın bir nömrəli ofisində ABŞ Prezidenti Donald Trampın iştirakı ilə "Azərbaycan Respublikası ilə Ermənistan Respublikası arasında sülhün qurulması və dövlətlərarası münasibətlər haqqında Saziş" layihəsinin paraflanması ilə nəticələndi”.

Hicran Hüseynova deyib ki, bu hadisə Azərbaycanın qlobal səhnədə qalib ölkə kimi statusunu bir daha təsdiqlədi: “Bu ölkə öz liderinin qətiyyəti sayəsində bütün Cənubi Qafqaz və bəlkə də daha geniş region üçün mövcudluq təhlükəsi yaradan münaqişəni tarixin arxivinə göndərdi. Prezident İlham Əliyevin təşəbbüsləri regionda sülhün və sabitliyin təmin edilməsinə yönəlib və bunu real addımlarla nümayiş etdirir. Onun Azərbaycanın ərazi bütövlüyünün və suverenliyinin bərpasındakı rolu qlobal səhnədəki mürəkkəb problemlərin uğurla həll edilməsinin nümunəsi kimi vurğulanır.

Beləliklə, əminliklə demək olar ki, beynəlxalq kontekstdə Azərbaycan genişmiqyaslı dəyişikliklər və xarici çətinliklər dövründə dövlətin sabitliyində həlledici amilin onun milli liderinin şəxsiyyəti olduğunu nümunə göstərir. Liderin siyasi iradəsi və strateji düşüncəsi həm inkişaf vektorlarını, həm də daxili sabitliyi, eləcə də ölkənin beynəlxalq arenadakı qələbələrini müəyyən edir. Prezident İlham Əliyevə nüfuzlu Şeyx Zayed Mükafatının verilməsi müstəqil Azərbaycan Respublikasına bütün beynəlxalq ictimaiyyət tərəfindən hörmət edilən dünya səviyyəli bir lider tərəfindən rəhbərlik edildiyini və dövlətimizin onun rəhbərliyi ilə mütərəqqi inkişafını davam etdirəcəyini bir daha təsdiqləyir.

Vaxtı ilə Ümummilli Liderimiz Heydər Əliyev deyirdi ki, “Biz nazik sapın üstü ilə gedirik. Odur ki, biz gərək bu siyasəti o qədər ağılla, o qədər məharətlə aparaq ki, Azərbaycanın milli mənafeləri müdafiə olunsun, ərazi bütövlüyümüz təmin edilsin, Azərbaycan müharibə şəraitindən çıxa bilsin”. Onun özü qədər inandığı Prezident İlham Əliyev 2003-cü ildən başlayaraq bu tarixi missiyanı yüksək vətəndaşlıq, vətənpərvərlik, insansevərlik hissi ilə uğurla həyata keçirir. Onun nəticələrini təkcə biz hiss etmirik, bunu bütün region, dünya hiss edir, xalqlar görür, dövlətlər, beynəlxalq təşkilatlar qəbul edirlər. Hər kəs Prezident İlham Əliyevin ikili standartlara, ədalətsizliyə, bərabərsizliyə qarşı apardığı mübarizəni və onun real nəticələrini təsdiq edir. Biz öz ölkəmizlə, dövlətimizlə, prezidentimizlə fəxr edirik”.