BAKI, 7 oktyabr. TELEQRAF

Dənizkənarı Bulvar İdarəsi İdarə Heyətinin sabiq sədri İlqar Mustafayev, köməkçisi Rəşad Bədəlov və “GİRASOL” MMC-nin direktoru Fuad Babayevin cinayət işi üzrə məhkəmə prosesi keçirilib.

Teleqraf xəbər verir ki, Bakı Ağır Cinayətlər Məhkəməsində keçirilən prosesdə təqsirləndirilən İlqar Mustafayevin oğlu Əziz Mustafayev şahid qismində ifadə verib.

O bildirib ki, ibtidai istintaq zamanı verdiyi ifadəsində ona təqdim olunan rəqəmlər həqiqəti əks etdirməyib. Onun sözlərinə görə, mənimsənilən məbləğlərlə bağlı rəqəmlər ona göstərilib və həmin rəqəmlər 4-5 dəfə artıq oldugunu görüb.

Şahid deyib ki, qeyd olunan rəqəmlərlə bağlı onun özündə rəsmi çıxarışlar olub.

Daha sonra dövlət ittihamçısı şahidə İlqar Mustafayevin ailə üzvlərinin adına olan rəsmi əmlaklarla bağlı suallar ünvanlayıb. Əziz Mustafayev yalnız özünə məxsus əmlaklarla bağlı sualları cavablandıracağını deyib.

Bu zaman prosesə sədrilik edən hakim onun ailə üzvlərinə məxsus Xəzər rayonunun Şüvəlan qəsəbəsi və Səbail rayonu arazisindəki əmlaklarının oldugu barədə istintaq materiallarında müvafiq sənədlərin olduğunu xatırladıb.

Şahid isə öz növbəsində bununla bağlı ibtidai istintaqa hər hansı ifadə vermədiyini deyib.

Növbəti proses oktyabrın 14-na təyin edilib.

Qeyd edək ki, Dənizkənarı Bulvar İdarəsinin fəaliyyətinin yoxlanılması ilə bağlı Hesablama Palatasından daxil olan materiallar əsasında Baş prokuror yanında Korrupsiyaya qarşı Mübarizə Baş İdarəsində araşdırma aparılıb.

İbtidai istintaqla İlqar Mustafayev sözügedən idarədə işlədiyi dövrdə köməkçisi Rəşad Bədəlov, “GİRASOL” MMC-nin direktoru Fuad Babayev və başqaları ilə birgə rəsmi sənədlərə yalan məlumatlar daxil etməklə qurumun ərazisində yerləşən qeyri-yaşayış sahələrinin icarəyə verilməsi, ərazidə kommersiya obyektlərinin fəaliyyətinin təşkil edilməsi, gəmi gəzintiləri və digər bu kimi fəaliyyət sahələrindən əldə edilən 12 milyon manatdan artıq vəsaiti mənimsəməkdə təqsirli biliniblər.

Bundan başqa, İlqar Mustafayevin 1 milyon 800 min manatdan artıq məbləğdə vergiləri dövlət büdcəsinə ödəməkdən yayınmaqda və cinayət yolu ilə əldə edilmiş pul vəsaitinin 10 milyon manatdan artıq hissəsini özü və qohumlarının adına əqdlər bağlamaq yolu ilə müvafiq əmlaklar alaraq leqallaşdırmaqda təqsirli bilinib.

İlqar Mustafayevə Cinayət Məcəlləsinin 179.4 (xüsusilə külli miqdarda törədilməklə mənimsəmə), 193-1.3.2 (xeyli miqdarda törədilməklə cinayət yolu ilə əldə edilmiş əmlakı leqallaşdırma), 213.3 (xüsusilə külli miqdarda vergiləri ödəməkdən yayınma), 308.2 (ağır nəticələrə səbəb olmaqla vəzifə səlahiyyətlərindən sui-istifadə etmə) və 313-cü (vəzifə saxtakarlığı), Fuad Babayev və Rəşad Bədəlova isə həmin Məcəllənin 179.4, 308.2 və 313-cü maddələri ilə ittiham elan edilib.

İlqar Mustafayev barəsində həbs, digərləri ilə bağlı isə polisin nəzarəti altına vermə növündə qətimkan tədbiri seçilib.

Cinayət işi üzrə müəyyən edilən ziyanın ödənilməsini təmin etmək məqsədilə dəyəri 11 milyon manatdan artıq əmlak üzərinə həbs qoyulub.