Bakı, 3 aprel. TELEQRAF

Bu ilin ilk rübündə İpoteka və Kredit Zəmanət Fondunun vəsaiti hesabına 124,9 milyon manat məbləğində 1251 ipoteka krediti rəsmiləşdirilib.

Fonddan Teleqraf-a verilən xəbərə görə, onun da 41,9 milyon manatı (508 kredit) güzəştli ipoteka kreditlərinin payına düşüb.

Ümumilikdə, 2006-cı ildən indiyədək Fondun vəsaiti hesabına 3,4 milyard manatdan çox ipoteka krediti verilib ki, onun da 988,5 milyon manatı güzəştli ipoteka kreditləridir. Verilmiş kreditlər hesabına 53 829 ailə özünün mənzil şəraitini yaxşılaşdırıb. İpoteka kreditlərindən faydalananların 67%-i gənclər və gənc ailələrdir.

Şəxsi yığımları yetərli olmayan əhalinin daha aşağı ilkin ödənişlə ipoteka kreditindən faydalanmasını təmin etmək məqsədilə 31 mart 2025-ci il tarixinə Fond tərəfindən ümumilikdə 107,4 milyon manat məbləğində 1 211 sayda zəmanətli ipoteka krediti verilib.

2025-ci ilin ilk rübü ərzində adi ipoteka kreditləri üzrə orta illik faiz dərəcəsi 7,5% təşkil edib.