BAKI, 3 aprel. TELEQRAF

Ukraynanın “Naftoqaz” şirkəti növbəti istilik mövsümü üçün 4,5 milyard kubmetr qaz idxal etməyi planlaşdırır.

Teleqraf xəbər verir ki, bu barədə “Forbes”in Ukrayna bürosu məlumat yayıb.

Nəşrin yazdığına görə, martın sonunda Ukraynanın yeraltı qaz anbarlarında ehtiyatlar rekord həddə azalaraq 6 milyard kubmetrdən aşağı düşüb. Hazırkı qiymətlərə əsasən, 4,5 milyard kubmetr qazın alınması 90 milyard qrivenə (təxminən 2,18 milyard dollar) başa gələcək. Ali Radanın deputatı Yaroslav Jeleznyak bildirib ki, Kiyev təcili olaraq tərəfdaşlarından vəsait cəlb etməlidir. Forbes-in məlumatına görə, "Naftogaz" 3 600 milyon dollar cəlb etməyi planlaşdırır.

Ukraynada qaz qıtlığı Rəsmi Kiyevin “Qazprom”la müqaviləni yeniləməkdən imtina etməsi səbəbindən yaranıb. Tranzit boruda təzyiqi saxlamaq üçün texniki qaza tələbat artıb. Yanvarın sonundan etibarən “Naftoqaz” Avropa Birliyi ölkələrindən yüksək bazar qiymətləri ilə qaz idxal etməyə başlayıb.

Fevralın əvvəlində ölkənin energetika naziri German Qaluşenko bəyan etmişdi ki, Ukrayna ilin sonuna qədər ən azı 1 milyard kubmetr idxal etməlidir. Qaz qıtlığı səbəbindən ölkədə istilik mövsümü martın sonunda, nəzərdə tutulan vaxtdan tez başa çatıb.

Fevralın 5-nə Ukraynanın qaz anbarlarının doluluq səviyyəsi 10% təşkil edib. Bu da son illərin antirekordudur.

Öz növbəsində, RBC-Ukrayna agentliyi xəbər verib ki, "Naftoqaz" artıq BVF-dən qaz idxalı üçün pul ayırmağı xahiş edib. Bu, fond nümayəndələri tərəfindən təəccüblə qarşılanıb. Çünki martın sonunda Ukraynanın Baş naziri Denis Şmıqal bildirmişdi ki, Avropa Yenidənqurma və İnkişaf Bankı (AYİB) qazın alınması üçün “Naftoqaz”a 270 milyon avro ayırıb.