BAKI, 3 aprel. TELEQRAF

Azərbaycan-Moldova iqtisadi əməkdaşlıq üzrə birgə hökumətlərarası komissiyanın aprelin 11-də Bakıda keçiriləcək altıncı iclası və biznes forumun təşkili müzakirə edilib.

Teleqraf xəbər verir ki, kənd təsərrüfatı naziri Məcnun Məmmədov Moldovanın Azərbaycandakı fövqəladə və səlahiyyətli səfiri Aleksandr Esaulenko ilə görüşüb.

Azərbaycan və Moldova arasında indiyədək müxtəlif istiqamətlərdə, o cümlədən iqtisadi sahədə bir çox sənədlərin imzalandığı qeyd olunub. Bildirilib ki, ticarət və investisiya əməkdaşlığının daha da genişləndirilməsi üçün böyük imkanlar var. Bu baxımdan, iş adamlarının iştirakı ilə müntəzəm olaraq biznes forumların və sərgilərin keçirilməsinin xüsusi əhəmiyyət kəsb etdiyi diqqətə çatdırılıb. Ölkəmizdə etibarlı və əlverişli biznes mühiti və böyük tranzit potensialının olduğunu xatırladan nazir Məcnun Məmmədov qeyd edib ki, moldovalı sahibkarlar Azərbaycanın investisiya imkanlarını dəyərləndirə və ölkəmizin nəqliyyat-tranzit potensialından daha geniş istifadə edə bilərlər.