BAKI, 3 aprel. TELEQRAF

Azərbaycan Dəmir Yolları (ADY) 2025-ci ilin yanvar-mart aylarında 2 074 455 sərnişin daşıyıb ki, bu da 2024-cü ilin eyni dövrü ilə müqayisədə 10% çoxdur.

Qurumdan Teleqraf-a verilən məlumata əsasən, 2024-cü ilin ilk üç ayında ADY-nin daşıdığı sərnişinlərin ümumi sayı 1 881 354 nəfər təşkil edib. Xüsusilə, Abşeron dairəvi dəmir yolu xətti ən çox istifadə olunan marşrut olub. 2024-cü ildə bu xətt üzrə 1 791 299 nəfər, 2025-ci ildə isə 1 950 282 nəfər sərnişin daşınıb. Bakı–Ağstafa–Bakı marşrutunda da artım müşahidə olunub – sərnişin sayı 79 265-dən 95 016-ya yüksəlib. Bakı–Balakən–Bakı xətti üzrə 2024-cü ildə sərnişindaşıma qeydə alınmazkən, 2025-ci ildə bu xətt üzrə 18 478 nəfər daşınıb.

Qeyd edək ki, xarici turistlərin dəmir yolu xidmətlərindən istifadəsi də artıb – 2024-cü ildə 4 443 nəfər xarici turist qeydiyyata alınmışdısa, 2025-ci ildə bu rəqəm 33% artaraq 5 921-ə çatıb.