BAKI, 4 aprel. TELEQRAF
"Rəqibi səhv buraxmağa məcbur edə bilsək, istədiyimiz nəticəni qazanacağıq”.
Teleqraf xəbər verir ki, bunu qadın futbolçulardan ibarət Azərbaycan milli komandasının baş məşqçisi Siyasət Əsgərov UEFA Millətlər Liqasının qrup mərhələsində Litva yığmasına qarşı bu gün keçirəcəkləri oyunla əlaqədar affa.az-a açıqlamasında deyib.
38 yaşlı mütəxəssis çox önəmli oyuna çıxacaqlarını bildirib: "Ardıcıl iki səfər matçı keçirəcəyik. Dörd gün sonra Monteneqronun qonağı olacağıq. Lakin indi bütün diqqətimizi Litva ilə qarşılaşmaya yönəltmişik. Litva ilk matçda Monteneqroya məğlub olub. Üç komandalı qrupda yer aldığımızdan, bugünkü oyunun önəmi çox böyükdür".
Əsgərov bəzi itkilərə rəğmən, komandaya cəlb olunan futbolçuların bu boşluğu dolduracaqlarına inam ifadə edib: "Düşərgədə ab-hava yüksəkdir, heyətdə yer alan oyunçuların heç birinin zədəsi yoxdur. Rəqibi təhlil etmişik, zəif və üstün cəhətlərini bilirik. Məşq proseslərini də buna uyğun qurmuşduq".
Qeyd edək ki, Vilnüsdəki “Jalgiris” stadionunda keçiriləcək Litva - Azərbaycan oyunu Bakı vaxtı ilə saat 19:30-da başlayacaq.
