BAKI, 4 aprel. TELEQRAF

“Dövlət qurumlarının fəaliyyətləri ilə bağlı məlumatlar daim cəmiyyətin diqqət mərkəzindədir”

Teleqraf xəbər verir ki, bunu Vətəndaşlara Xidmət və Sosial İnnovasiyalar üzrə Dövlət Agentliyinin (ASAN Xidmət) şöbə müdiri Murad Fətullayev "Asan Xidmət"in “Publik data portalı"nın təqdimat mərasimində deyib.

O bildirib ki, son 10-15 il ərzində ölkəmizdə gedən rəqəmsallaşma prosesi dövlət qurumlarının böyük həcmdə dataları toplamağa imkan verir: “Cəmiyyətin ayrı-ayrı üzvlərinin qurumların fəaliyyəti ilə bağlı açıq məlumatlara tələbi sürətlə artır. Artan tələbi qarşılamaq üçün platformanın təqdimat mərasimi keçirilir”.

Layihənin məqsədi Dövlət Agentliyinin fəaliyyətinə dair ictimai hesabatlığı təmin etmək, bu fəaliyyətdə vətəndaş iştirakçılığını təşviq etmək, akademik və biznes iştirakçıları üçün tədqiqat resursu yaratmaqdır.