BAKI, 4 aprel. TELEQRAF
"Qəbələ" komandası Azərbaycan Premyer Liqasına vəsiqəni təmin edə bilər.
Teleqraf xəbər verir ki, I Liqanın XX turunda bu gün səfərdə "Baku Sporting"lə oyunda məğlub olmayacağı təqdirdə, "qırmızı qaralar"ın elitaya yüksəlişi rəsmiləşəcək.
Binə qəsəbə stadionunda baş tutacaq qarşılaşma saat 16:00-da start götürəcək.
Kaxaber Tsxadadzenin rəhbərlik etdiyi kollektiv I Liqada 19 oyundan 49 xalla vahid liderdir. Sona 8 oyun qalmış 4-cü pillədəki "Baku Sportinq"in 26 xalı var. Heç-heçə təqdirində aradakı 23 xallıq fərq qorunacaq və qalan 7 turun hamısında "Qəbələ" uduzsa belə, ilk "3-lük"dən aşağı enməyəcək.
Qeyd edək ki, AFFA İcraiyyə Komitəsinin qərarına əsasən, növbəti mövsüm Premyer Liqada 12 komanda iştirak edəcək, I Liqadan isə 3 klub əsas liqaya yüksələcək. "Qəbələ" 2023/2024 mövsümündə sonuncu pilləni tutaraq aşağı diviziona düşmüşdü.
