BAKI, 3 aprel. TELEQRAF

OPEC+ daxilində Səudiyyə Ərəbistanı, Rusiya, İraq, BƏƏ, Küveyt, Qazaxıstan, Əlcəzair və Oman olmaqla səkkiz ölkə könüllü neft hasilatı ixtisarlarında iştirak edərək hasilat cədvəlində dəyişiklik etmək və may ayında gündəlik neft hasilatını 411 min barrel artırmaq qərarına gəlib.

Teleqraf xəbər verir ki, bu barədə OPEC-in rəsmi veb saytında məlumat yayılıb.

“Bazarın davam edən sağlam fundamentalları və pozitiv perspektivləri nəzərə alınaraq, 5 dekabr 2024-cü ildə qəbul edilən və 3 mart 2025-ci ildə yenidən təsdiqlənən qərara uyğun olaraq, 2025-ci il aprelin 1-dən 2,2 milyon barrel/gün həcmində könüllü ixtisarların tədricən, çevik şəkildə geri qaytarılmasına başlanacaq. Bu çərçivədə səkkiz iştirakçı ölkə 2025-ci ilin mayında ümumilikdə 411 min barrel/gün hasilat düzəlişi həyata keçirəcək. Bu artım əvvəlcədən planlaşdırılmış kvotaya əlavə olaraq iki aylıq artımı da əhatə edir. Eyni zamanda, artımlar bazar şəraitindən asılı olaraq ləğv edilə bilər. Bu çeviklik qrupun neft bazarının sabitliyini dəstəkləməsinə imkan verəcək”, - məlumatda qeyd edilib.

OPEC-ə daxil səkkiz ölkə 3 aprel 2024-cü il tarixində keçirilmiş 53-cü Nazirlərin Birgə Monitorinq Komitəsi (JMMC) iclasında razılaşdırılmış könüllü hasilat düzəlişlərinə sadiqliklərini bir daha təsdiqləyiblər. Onlar həmçinin 2024-cü ilin yanvar ayından bəri hasil edilən artıq həcmləri tam şəkildə kompensasiya etmək niyyətində olduqlarını və 15 aprel 2025-ci il tarixinədək OPEC Katibliyinə yenilənmiş, qabaqlayıcı kompensasiya planlarını təqdim edəcəklərini bildiriblər. Bu planlar Katibliyin veb-saytında dərc ediləcək.

İyun üçün hasilat səviyyəsinə may ayının 5-də keçiriləcək görüşdə qərar veriləcək.