BAKI, 4 aprel. TELEQRAF

Hər il 4 aprel tarixində qeyd olunan Beynəlxalq Mina Xəbərdarlığı və Mina Fəaliyyətinə Yardım Günü minaların və digər partlayıcı qurğuların sülhə, təhlükəsizliyə və insan həyatına ciddi problem yaratdığı ölkələrdə minatəmizləmə potensialının yaradılması və inkişafının təşviqinə xidmət edir.

Teleqraf xəbər verir ki, bu barədə Ombudsman Aparatı məlumat yayıb.

Məlumatda bildirilir ki, Ermənistan silahlı qüvvələri tərəfindən işğal dövründə, Vətən müharibəsi zamanı və torpaqlarımızın azad edilməsindən sonra ərazilərimizdə basdırılan minalar günahsız insanların həyat və sağlamlığı üçün ciddi təhlükə olaraq qalır.

Statistik məlumatlara əsasən, 1991-ci ildən bu günə qədər mina partlayışları nəticəsində 3400-dən çox şəxs zərər çəkib. Onlardan 359-u uşaq, 38-i isə qadındır.

Ombudsman Aparatı bu rəqəmlərin mina probleminin fundamental insan hüquqlarının kobud şəkildə pozulmasına səbəb olduğunu və regionda ədalətli, dayanıqlı sülhün təmin olunması yolunda böyük maneə yaratdığını qeyd edir.