BAKI, 3 aprel. TELEQRAF

Tacikistan Rusiya şirkətlərini 22 perspektivli neft və qaz yatağının işlənməsində, eləcə də emal layihələrində iştirak etməyə dəvət edib.

Teleqraf xəbər verir ki, bu barədə Tacikistanın energetika və su ehtiyatları naziri Daler Cuma TASS-a açıqlamasında bildirib.

O qeyd edib ki, bu il iki ölkənin birgə neft və qaz layihələrini müəyyənləşdirəcəyi, onların həyata keçirilməsinə isə 2026-cı ildə başlanıla biləcəyi gözlənilir:

"Ölkəmizdə 22 perspektivli neft və qaz yatağı var. Rusiya tərəfi ilə hasilat və emalla bağlı məsələləri müzakirə etdik. Bu il Rusiya ilə birlikdə prioritet yataqları müəyyən etməyi planlaşdırırıq. Düşünürəm ki, gələn il artıq bu yataqlarla bağlı konkret iş planlarımız olacaq", – deyə o qeyd edib.

Cuma əlavə edib ki, Tacikistan hazırda neft və qaz məhsullarının böyük hissəsini Rusiyadan idxal edir. Ölkədə yeni neft və qaz yataqlarının işlənməsi Tacikistana bu resursları cənub istiqamətində ixrac etməyə imkan verəcək.

Qeyd edək ki, Tacikistanda rəsmi qeydiyyata alınmış təxminən 28 neft yatağı mövcuddur və onların sübut olunmuş ehtiyatları 2 milyon tondan artıqdır. Ölkədə 12 neft emalı zavodu fəaliyyət göstərir.