BAKI, 29 iyul. TELEQRAF

Sabah bizi “Payde” ilə oyun gözləyir. İlk oyunda səfərdə məğlub olmuşuq.

Teleqraf xəbər verir ki, bu sözləri “Zirə”nin baş məşqçisi Rəşad Sadıqov “Payde” (1:0) ilə oyun öncəsi mətbuat konfransında deyib.

"Rəqibin üstünlüyü var, amma azarkeşlər önündə mərhələ keçən tərəf biz olmaq istəyirik.

Ümumiyyətlə, bir çox suala istədiyim şəkildə cavab verə bilmərəm. Çünki qarşıda mətbuat konfransı var və müəyyən məxfi məqamlar mövcuddur. Bəzi sualların cavabını, inşallah, sabah keçiriləcək mətbuat konfransından sonra açıqlayacağam.

Ümumilikdə oyun istədiyimiz kimi keçdi. Qarşılaşmanın 90 dəqiqəsini təhlil etdikdə komandanın çıxışından razı qaldığımızı deyə bilərəm. Romanın da qeyd etdiyi kimi, oyuna nəzarət edən tərəf biz idik. Lakin qarşımızda təcrübəli və nəticəyə hesablanmış futbol oynamağı bacaran komanda var idi. Bunu həm oyun zamanı hiss etdik, həm də sonrakı təhlildə aydın gördük. Rəqib bizi yaxşı təhlil etmiş və nəticə qazanmaq üçün uyğun oyun planı hazırlamışdı.

Birinci hissədə fərqlənməli idik. Təəssüf ki, yaratdığımız çoxsaylı qol imkanlarından istifadə edə bilmədik. İkinci hissənin müəyyən dəqiqələrində oyun bərabər səviyyədə keçdi. Bəzi epizodlarda rəqib, bəzi anlarda isə biz üstünlük əldə etdik.

Son 10 dəqiqə isə heç istəmədiyimiz şəkildə keçdi. Rəqib bu müddətdə çoxsaylı künc zərbələri və standart vəziyyətlər qazandı. Aut atışından sonra buraxdığımız qol bizi olduqca məyus etdi.

Futbolda kifayət qədər təcrübəm var və bilirəm ki, yaxşı oynamaq hər zaman nəticə qazanmaq üçün kifayət etmir. Oyun sənin üçün istədiyin kimi keçə bilər, amma rəqib hər an nəticəni dəyişə bilər. Buna görə də sabah həm yaxşı oynamaq, həm də yaxşı nəticə qazanmaq istəyirik.

Qarşımızdakı rəqib təcrübəli komandadır. Heyətində kifayət qədər təcrübəli futbolçu var. Baş məşqçiləri də təcrübəli mütəxəssisdir və futbolçu olduğu dövrdə güclü çempionatda çıxış edib. Sabah əlimizdən gələni edəcəyik. Məqsədimiz oyun planımızı meydanda həyata keçirmək və istədiyimiz nəticəni qazanmaqdır.

Düşünürəm ki, komandaların oyun sistemlərində ciddi dəyişiklik olmayacaq. Ola bilər ki, rəqib ilk görüşün ikinci hissəsindəki çıxışından sonra sabah bizə qarşı daha inamlı və güclü oynasın. Bunu gözləyirik.

İlk hissədə böyük üstünlüyə malik idik. İkinci hissədə isə oyun müəyyən dəqiqələrdə bərabər səviyyədə keçdi, bəzi epizodlarda rəqib, bəzi anlarda isə biz üstünlük qazandıq.

Rəqibin sabahkı oyun üçün öz planı olacaq. Onların meydanda necə davranacağını dəqiq bilmirik. Ancaq bizim də öz istəyimiz və oyun planımız var. İlk dəqiqələrdən etibarən meydanda öz futbolumuzu oynamağa çalışacağıq”.

“Görürsünüz ki, bizdə hər məsələ çox dərindən təhlil olunur. Bəzən mütəxəssis olaraq bundan biz də əziyyət çəkirik. Məsələn, 55-ci dəqiqədə etdiyim dəyişikliklə bağlı sual veriləndə düşünürəm ki, mənim yerimdə olan başqa məşqçi də eyni qərarı verərdi. Bir məsələni sual şəklində vermək var, bir də qınaq kimi səsləndirmək.

Həmin dəyişiklikdən sonra meydanda bəzi taktiki yerdəyişmələr etdik və müdafiəni gücləndirdik. İsa ötən mövsüm, deyilənlərin əksinə olaraq, problemsiz mövsüm keçirməyib. O, altı dəfə zədələnib. Müxtəlif vaxtlarda dörd ay, bir ay və üç həftə meydana çıxa bilməyib. Finaldan əvvəl də ciddi zədə aldı və təxminən bir ay bərpa prosesi keçdi.

Özünüz də görürsünüz ki, onu oyunlara tədricən hazırlayırıq. Payde ilə səfər matçında ilk dəqiqələrdən meydana buraxsaq da, yüz faiz hazır olmadığını bilirdim. Sadəcə, bu qarşılaşmada ona ehtiyacımızın olacağını düşünürdüm. İstəyirdim ki, sabahkı matçdan əvvəl müəyyən oyun təcrübəsi qazansın. Ümid edirəm ki, İsa sabah yaxşı çıxış edəcək”.