BAKI, 29 iyul. TELEQRAF

"Qarabağ" topla oynamağı sevən, çox ciddi bir rəqibdir. İlk matçdakı oyunu təkrarlamalıyıq. Hamımız yolumuza davam etmək istəyirik".

Teleqraf xəbər verir ki, bu sözləri Bolqarıstanın ÇSKA klubunun baş məşqçisi Xristo Yanev UEFA Avropa Liqasının II təsnifat mərhələsinin "Qarabağ"la sabah keçiriləcək cavab matçından öncə keçirilən mətbuat konfransında deyib.

Mütəxəssis oyunda əzmkarlıq sayəsində uğur qazanmağın mümkün olduğunu bildirib: "Mən heç vaxt komandanı müdafiə və hücuma bölməmişəm. Rəqibə qarşı möhkəm dayanmalı və öz güclü tərəflərimizi göstərməliyik. Bütün komanda maksimum gücünü ortaya qoymalıdır. Heç kim qeyri-stabil çıxış etmək istəmir. Amma bu, dünyanın hər yerində baş verir. Sabitlik lazımdır. Bilirəm ki, Bolqarıstanda prosesləri gözləməyə səbir yoxdur. Lakin bunun üçün vaxt tələb olunur. Hamımız buna nail olmaq üçün çalışırıq. James Eto'o "Botev"lə matçda olduğu kimi, "Qarabağ"a qarşı da oynamağa hazırdır. Bütün futbolçuların ən yaxşı formada olmasını istəyirəm. James keyfiyyətli futbolçudur. Hamımız istəyirik ki, meydana çıxanda komandaya qələbə qazandıran oyun nümayiş etdirsin.

Mən hər gün eyni işi görürəm - komandanı növbəti oyuna ən yaxşı şəkildə hazırlayıram. Qarşılaşmanın əhəmiyyətini və rəqibin ciddiliyini bilirik. Xəyallara qapılmırıq, ayaqlarımız yerdədir. Azarkeşlərin dedikləri vacibdir. ÇSKA hər vəziyyətdə irəli getməlidir. Oyunda baş verə biləcək bütün ssenariləri nəzərə almışıq. Hər şey ola bilər. Keyfiyyətimiz var və öz gücümüzə inanmalıyıq. İlk matç göstərdi ki, "Qarabağ"ın oyununda bizi narahat edə biləcək çox məqam var. Onların yaxşı futbolçuları, təcrübəli baş məşqçisi və öz oyun üslubu var. Bütün bunları ətraflı təhlil etmişik. Amma bizim də çox keyfiyyətli futbolçularımız var. Rəqibin oyununa tam uyğunlaşmamalıyıq. Sabah uğur qazana bilərik".

Baş məşqçi azarkeşlərin rolundan da danışıb: "Hazırda futbolçu olduğum dövrlə müqayisədə daha çox məlumata sahibik. İşlədiyim məşqçilərdən, həmçinin "Liverpul", "Milan", "Blekbern" və "Bayer"ə qarşı keçirdiyim oyunlardan çox şey öyrənmişəm. Həmin matçlardakı məşqçilərimin öz futbolçularına inamını nümunə götürürəm. O vaxt stadion qaynayan qazan idi. Sabah da bunu görmək istəyirəm. Enerji meydançaya ötürülməli və hamı hansı böyük klubda çalışdığımızı hiss etməlidir".

Qeyd edək ki, sabah Sofiyada keçiriləcək ÇSKA - "Qarabağ" matçı Bakı vaxtı ilə saat 22:00-da başlayacaq. Komandalar arasındadı Bakıdakı ilk görüş qolsuz heç-heçə ilə bitmişdi