BAKI, 5 aprel. TELEQRAF

Qadınlardan ibarət Azərbaycan yığması UEFA Millətlər Liqasında ikinci oyununu keçirib. C Liqasının 4-cü qrupunda yer alan milli komanda Vilnüsdə Litvanın qonağı olub.

“Jalgiris” stadionunda təşkil olunmuş qarşılaşma millinın 2:0 hesablı qələbəsi ilə yekunlaşıb. Qolları 21-ci dəqiqədə Esra Manya və 55-ci dəqiqədə Nigar Mirzəliyeva vurub.

Matçdan sonra Mirzəliyeva Teleqraf-a müsahibə verib. 23 yaşlı müdafiəçi həm dünənki, həm də aprelin 8-də səfərdə Monteneqro yığmasına qarşı keçirəcəkləri görüşlə bağlı sualları cavablandırıb:

- Millətlər Liqasında Litvanı məğlub edərək liderliyə yüksəldiniz. Oyunla bağlı təəssüratlarınız necədir?

- ⁠Litva ilə oyun gərgin və emosional keçdi. Bu komandaya qarşı ciddi hazırlaşmışdıq və meydanda sona qədər mübarizə apardıq. Kollektiv şəkildə bir-birimizə inanıb dəstək olduq. Bu birlik bizə qələbə gətirdi. Azarkeşlərin dəstəyi də bizə əlavə güc verdi. Oyunun ritmi yüksək idi. Amma biz taktiki olaraq düzgün və həvəsli oynadıq. Sonda da istədiyimiz nəticəni qazandıq.

- ⁠40-cı dəqiqədə rəqib futbolçu ayağı ilə sizə vurdu. Həmin epizodu necə şərh edərdiniz?

- ⁠Oyunun içində bəzi gərgin anlar yaşandı. Rəqib komandanı başa düşmək olar, çünki uduzurdular və məğlubiyyət onları aqressivləşdirmişdi.

- ⁠Həmin epizoddan bir dəqiqə sonra baş məşqçi Siyasət Əsgərov qırmızı vərəqə aldı. Səbəb nə idi?

- ⁠Mənə qarşı bir az kobudluq yaşandı. Baş məşqçi Siyasət Əsgərov aranı sakitləşdirmək üçün meydana hakim icazəsi olmadan daxil olduğu üçün ona qırmızı vərəqə göstərildi. Siyasət müəllimin məqsədi qaydanı pozmaq yox, yaşana biləcək gərginliyin qarşısını alıb, komandasını qorumaq idi. Çox təəssüf ki, "qırmızı" alaraq uzaqlaşdırıldı. Amma biz komanda olaraq baş məşqçimizə qarşı haqsızlığın inadına oyun tempini düşürmədik. Onun verdiyi tapşırıqları düzgün yerinə yetirdik və qələbə qazandıq.

- Pay sahiblərindən biri kimi, bu qələbənizi kimə həsr edirsiniz?

- ⁠Bu oyunu zədələnmiş komanda yoldaşımız Kristina Bakarandzenin şərəfinə oynadıq. Onun yanımızda olmadığını hər an hiss etdik. Qolumu Kristinaya həsr edir, tezliklə sağalaraq yenidən bizimlə olmasını arzulayıram.

- ⁠Adətən kişilərdən ibarət yığmada milli ruh məsələsi qabardılır, amma qadınlarda yox. Bu barədə nə deyərdiniz?

- ⁠Biz vətənimizi ürəkdən sevirik. Hər dəfə bayrağımızı yüksəldəndə, himnimiz səslənəndə içimizdə qürur və sevinc baş alıb gedir. Azərbaycanı təmsil etməyimiz yalnız oyun üçün deyil, həm də bir borcdur. Bu gün biz bir daha göstərdik ki, həm güclüyük, həm də ailə kimi birlikdəyik. Qələbəmiz hər bir azərbaycanlı, xüsusilə də bu yolda bizə inananlar üçündür. Bu anı heç vaxt unutmayacağıq. Azarkeşlərə də təşəkkürümü bildirirəm, bizi tək qoymadılar. Sona qədər möhtəşəm dəstəklərini göstərdilər.

- Monteneqronu artıq tanıyırsınız, Bakıda qolsuz heç-heçə etmisiniz. Bu dəfə nəyin sayəsində rəqibi üstələyə bilərsiniz?

- ⁠Monteneqro güclü komandadır. Hər 2 oyunumuzun səfərdə olması özümüz üçün bir az çətin ola bilər. Çünki yol bizi yorur. Monteneqro isə evdə oynayır. Onlar qarşıdakı oyunda yaxşı mübarizə aparacaqlar ki, qələbə qazansınlar. Lakin öz komandamızın da məqsədi var. Əlimizdən gələni edəcəyik ki, qələbə bizim olsun.

- ⁠Yenə heç-heçə sizi qane edəcəkmi?

- ⁠Bakıda Montenoqro ilə oyunda hava şəraiti bizə mane oldu. Hava çox soyuq idi ve qar vardı. Amma bu oyunda qalibiyyət üçün çalışacağıq. Buna gorə də 8 aprel qarşılaşmasına ciddi hazırlaşırıq.