BAKI, 2 aprel. TELEQRAF

Almaniya Kubokunun yarımfinal mərhələsində iddialı komandalardan olan "Bayer"in III Bundesliqa təmsilçisi "Arminiya"ya 1:2 hesabı ilə uduzaraq, mübarizəni dayandırması futbol dünyasında maraqla qarşılanıb.

Teleqraf xəbər verir ki, son olaraq, 2022-ci ildə əsas liqadan enməyə başlayan Bilefeld hazırda səviyyəcə üçüncü sayılan ölkə çempionatında 50 xalla dördüncü pillədə qərarlaşıb.

İndi "Arminiya"nın ümumi dəyəri 9 milyon avronu keçmir. Bu, "Bayer"in heyətindən (644 milyon avro) 80 dəfə azdır.

"Arminiya" "Bayer"lə eyni bölgədəndir - Şimali Reyn-Vestfaliya. Bu, o deməkdir ki, qarşılaşma derbi sayıla bilər.

3-cü liqa klubunun təmsil etdiyi Bilefelddə Leverkuzendəkindən iki dəfə çox insan yaşayır – 166 minə qarşı 338 min nəfər.

"Arminiya"nın baş məşqçisi, 39 yaşlı Mitç Kniat, futbolçu karyerasında heç vaxt Bundesliqada oynamayıb.

"Arminiya"nın heyətində yaşı 30-dan yuxarı olan oyunçular yoxdur.

1905-ci ildə yaradılan klub 4 dəfə II Bundesliqanı qazanıb, bir dəfə isə İntertoto Kubokunun finalına çıxıb.

Komanda bizim eranın 9-cu ilində romalıları Tevtoburq meşəsi döyüşündə məğlub edən heruskilər tayfasının rəhbəri Arminiusun adını daşıyır.

"Bayer" isə ötən mövsüm "Qarabağ"la həm Avropa Liqasının qrup mərhələsində, həm də 1/8 finalda üz-üzə gəlib. Qrup oyunlarında evdə 5:1, səfərdə 1:0 hesablı qələbə qazanan Xabi Alonsonun baş məşqçi olduğu kollektiv 1/8 final görüşlərində ciddi çətinliklə üzləşib. "Qarabağ" həm Bakıdakı, həm də Leverkuzendəki qarşılaşmalarda 2 top fərqi ilə öndə olsa da, hər iki halda qələbəni əldən verib - 2:2, 2:3. Ötən mövsüm yalnız Avropa Liqasının finalında İtaliya "Atalanta"sına 0:3 hesabı ilə uduzan Almaniya klubu hazırda Bundesliqada 27 oyundan 59 xalla 2-ci yerdə gedir. Çempionlar Liqasında isə Leverkuzen komandası 1/8 finalda "Bavariya"ya 0:3 və 0:2 hesaları ilə uduzaraq, mübarizəni dayandırıb.

Qeyd edək ki, Almaniya Kubokunun finalında "Arminiya" “Ştutqart” – “Leyptsiq” matçının qalibi ilə qarşılaşacaq. Kubokun qalibi olacağı təqdirdə, Bilefeld komandası Avropa Liqasına vəsiqə qazanacaq.