BAKI, 7 oktyabr. TELEQRAF
Britaniya kral ailəsinin həkimi Hanna Terri İngiltərənin şərqində, Norfolk qraflığındakı Sandrinqam malikanəsinin yaxınlığında yerləşən evində ölü tapılıb.
Teleqraf xəbər verir ki, bu barədə “The Sun” qəzeti məlumat yayıb.
45 yaşlı Terrinin meyiti oktyabrın 4-də aşkarlanıb. Məlumata görə, o, başından küt alətlə aldığı zərbə nəticəsində həyatını itirib.
Həkimin əri Mark Keyn qətldə ittiham olunur. O, daha əvvəl hüquq-mühafizə orqanları tərəfindən saxlanılıb.
Hanna Terri Sandrinqam malikanəsində olduqları müddətdə kral ailəsinin yüksək vəzifəli üzvlərinə tibbi xidmət göstərib.
Qəzetin mənbələrinin məlumatına görə, Terrinin ölümü barədə Britaniya kralı III Çarlz və kraliça Kamillaya məlumat verilib.
