BAKI, 24 yanvar. TELEQRAF

ABŞ Müdafiə Nazirliyi Sakit okeanda narkotik daşınması ilə əlaqəli olduğu iddia edilən gəminin vurulması anını əks etdirən videonu yayıb.

Teleqraf xəbər verir ki, görüntülər ABŞ Müdafiə Nazirliyi və ABŞ-nin Cənub Komandanlığı tərəfindən açıqlanıb.

Havadan çəkilmiş videoda kiçik və sürətli hərəkət edən gəmi görünür. Göyərtədə bir neçə nəfərin olduğu ehtimal edilir. Bir neçə saniyə sonra güclü partlayış baş verir və gəmi zərbə altına düşür. Növbəti kadrlar yalnız partlayışın izi və dalğaların yayılmasını göstərir.

ABŞ-nin Cənub Komandanlığının birləşmiş qüvvələri daha əvvəl Sakit okeanda sözügedən gəminin məhv edildiyini bəyan edib. ABŞ kəşfiyyatının məlumatına görə, gəmi Sakit okeanın şərq hissəsində narkotik alveri üçün istifadə olunan tanınmış marşrutlar üzrə hərəkət edib və narkotiklərin daşınması əməliyyatlarında iştirak edib.

Pentaqonun iddiasına əsasən, zərbə nəticəsində iki nəfər həlak olub, bir nəfər isə sağ qalıb.