BAKI, 11 avqust. TELEQRAF

Niderlandın Rotterdam şəhərində keçirilən “Krosveyk” qəbiristanlığında ukraynalı polkovnik Yevgen Konovaletsin qalıqları eksqumasiya edilib.

Teleqraf xəbər verir ki, bu barədə Ukrayna Prezidentinin saytında məlumat verilib.

Eksqumasiya Ukrayna Prezidenti Volodimir Zelenskinin tapşırığı ilə həyata keçirilib.

Yevgen Konovaletsin külü Ukraynaya qaytarılacaq və Milli Hərbi Memorial Məzarlığında yenidən dəfn ediləcək. Vida mərasimi Kiyevdə Məsihin Dirilməsi Kafedralında keçiriləcək.

Qeyd edək ki, Konovalets (1891-1938) Ukrayna hərbçisi və millətçi-siyasi xadim, Ukrayna Millətçiləri Təşkilatının (OUN) ilk rəhbəri olub. Birinci Dünya müharibəsi dövründə Avstriya-Macarıstan ordusunda xidmət edib, sonradan Ukrayna milli qüvvələrinə qoşulub. 1920-ci illərdə Ukrayna Hərbi Təşkilatının (UVO) yaradılmasında iştirak edib.

1929-cu ildə OUN-un yaradılmasına rəhbərlik edib və təşkilatın ilk rəhbəri olub. Əsas məqsədi müstəqil Ukrayna dövlətinin yaradılması idi. 1938-ci ildə Rotterdamda sovet kəşfiyyatı tərəfindən təşkil edilən sui-qəsd nəticəsində öldürülüb.

Konovalets Stepan Banderadan əvvəlki nəsil Ukrayna millətçi hərəkatının əsas liderlərindən biri olub. Sonrakı dövrdə Bandera OUN daxilində mühüm fiqura çevrilib.

Medial