BAKI, 16 mart. TELEQRAF

Yeni avtomobil yolu layihəsi çərçivəsində Nərimanov rayonu, Əhməd Rəcəbli və Uluqbəy küçələrinin kəsişməsindəki dairədə aparılan yenidənqurma işləri səbəbindən martın 17-dən etibarən 17 və 24 nömrəli marşrutların hərəkət sxemində müvəqqəti dəyişikliklər olacaq.

Azərbaycan Yerüstü Nəqliyyat Agentliyindən (AYNA) Teleqraf-a verilən məlumata görə 17 nömrəli marşrutun hərəkət istiqaməti aşağıdakı kimi dəyişdiriləcək:

Yeni Yasamal yaşayış massivi istiqamətində: Əhməd Rəcəbli küçəsindəki son dayanacaqdan çıxaraq dairəvi hərəkətlə Uluqbəy və Əhməd Rəcəbli küçələrinin kəsişməsini keçəcək, sonra yenidən Əhməd Rəcəbli küçəsindən Fətəli xan Xoyski küçəsinə yönələrək əvvəlki sxem üzrə hərəkətini davam etdirəcək.

24 nömrəli marşrutun hərəkət istiqaməti isə belə olacaq:

Qaraçuxur qəsəbəsi istiqamətində: Təbriz küçəsindəki son dayanacaqdan çıxaraq Əhməd Rəcəbli küçəsi və Ziya Bünyadov prospektindən keçəcək, sonra isə mövcud sxem üzrə hərəkət edəcək.

AYNA bildirir ki, bu dəyişikliklər müvəqqətidir və yenidənqurma işləri başa çatdıqdan sonra marşrutlar əvvəlki hərəkət sxeminə qaytarılacaq. Sərnişinlərdən yeni sxemə uyğun olaraq səyahətlərini planlaşdırmaları və yaranan narahatlığa görə anlayışla yanaşmaları xahiş olunur.