ANKARA, 19 dekabr. TELEQRAF

Türkiyədə keçirilən Dezinformasiyaya Qarşı Mübarizə üzrə Türk Dövlətləri Forumunda "Ortaq gələcək qurulmasında türk mediası" paneli başa çatıb.

Teleqraf-ın Ankaraya ezam olunmuş müxbiri xəbər verir ki, paneldə bir neçə ölkədən rəsmi şəxslər çıxış ediblər.

Qırğızıstanın "MediaHub" redaksiyasının əməkdaşı Akzhol İslamova qeyd edib ki, rəqəmsal texnologiyaların media sahəsinə daxil olması ilə informasiya ötürülməsinin forması dəyişib.

"Əvvəllər ənənəvi jurnalistika standartlarına əsaslanan məlumat mənbələri söz və yazı üzərində qurulurdu. İndi struktur dəyişib. Artıq məzmun yeni rəqəmsal formatlarda təqdim olunur. Bu proses türk mediası üçün böyük dönüş nöqtəsi oldu.

Rəqəmsal əməkdaşlıq türk mediasının qlobal informasiya məkanında tanınmasına və ehtiyaclara cavab verməsinə imkan yaradıb".

O, media sahəsində əməkdaşlıq üçün bir neçə təkliflə çıxış edib:

"Möhkəm institusional əsaslar yaradılmalıdır. Etik standartlara sadiq qalmaqla, yeni rəqəmsal mediaya uyğunlaşmaq, innovativ yanaşmaları tətbiq etmək və müasir auditoriyanın tələblərinə cavab vermək vacibdir. Media cəmiyyətə yaxınlaşdıqca, etibarlı və dayanıqlı informasiya mühiti formalaşır. Bu isə hamımız üçün strateji əhəmiyyət daşıyır".

Özbəkistan Respublikasının “Aloqabank”ın prezidenti, dil, mənəvi və maarif məsələləri üzrə dövlət müşaviri Xamza Djumaev çıxışında deyib ki, Türk dünyasının ortaq media platformasına ehtiyac var. Türk dünyasının media məktəbləri və jurnalistika akademiyaları yaradıla bilər.

O, faktların yoxlanılması mərkəzlərinin yaradıla biləcəyini təklif edib.

"Azərbaycanın mahnıları Özbəkistanın tədbir və toylarında çox maraqla qarşılanır. Qardaş ölkələrin media nümayəndələrini öz Mətbuat Şuramıza üzv etməliyik. Kənar təsirlərə qarşı öz mövqeyimizi ortaya qoya bilərik", - o əlavə edib.

Yaxın Şərq Universitetinin prorektoru Murat Tüzünkan isə çıxışında deyib ki, biz burada ortaq mədəniyyəti və ortaq duyğunu dəyərləndirməyə çalışan bir quruculuq, bir anlaşma prosesinin olduğunu görürük:

"Türk dövlətlərinin iş planında beynəlxalq dəyər qazanan, potensialını, səriştəsini və elmi biliklərini ön plana çıxaran zəngin bir strukturun mövcud olduğunu müşahidə edirik. Bu quruculuq prosesinə ayrı-ayrılıqda yenidən baxdıqda görürük ki, kimliklər hazır şəkildə ortaya çıxmır, onlar sosial qarşılıqlı təsir yolu ilə formalaşan konstruktiv məhsullardır. Konstruktivist yanaşmaya görə, ortaq kimlik və təhlükəsizlik anlayışlarının formalaşması məhz bu qarşılıqlı münasibətlər nəticəsində başlayır və inkişaf edir".

O, dezinformasiyalara qarşı birlikdə mübarizə aparmaq üçün bir neçə təkliflə çıxış edib:

"Media sadəcə məlumatlandıran bir vasitə deyil, həm də strateji bir vasitədir. Türk Dövlətlərinə edilən dezinformasiyalara və belə işlərlə məşğul olanlara qarşı birlikdə fikirlər irəli sürməli, dezinformasiya ilə mübarizə aparmalıyıq. Ortaq yayım etmək, birlikdə xəbər agentlikləri yaratmaq və məzmun analizi edə bilərik. Media ortaq gələcəyin inşasına töhfə verir. Ortaq gələcək isə ortaq dəyərlərlə, ortaq həqiqətlərlə inkişaf edə bilər. Ortaq kimlik yaratmaq çox önəmlidir. Bunun isə qalıcı olması üçün müəyyən qaydalar olmalıdır, ortaq çərçivələr müəyyən edilməlidir. Həmçinin ortaq bir dil də olmalıdır. Bu sahədə irəliləmək üçün qarşılıqlı ziyarətlər olmalı, bir-birimizi daha yaxşı anlayıb tanımalıyıq. Güclü olmaq üçün mütləq bacarıqlarımızı artırmalıyıq. Sadəcə öz dilimizlə deyil, beynəlxalq dillərdə də məzmunlar yaratmalıyıq".

Azərbaycanın Beynəlxalq Münasibətlərin Təhlili Mərkəzinin Direktorlar Şurasının üzvü Cavid Vəliyev isə iki gündür dezinformasiya haqqında danışıldığını və ən çox bunun üzərində dayanıldığını deyib.

"Biz dezinformasiya ilə mübarizə edəcəyik, amma bu bir qorunma üsuludur. Yalnız bu olmalı deyil, biz gündəmi də müəyyən etməliyik. Biz gündəmi müəyyən etdik. Azərbaycan olaraq torpaqlarımızı işğaldan azad edərə bacarığmızı göstərdik. Eyni zamanda dezinformasiya ilə də mübarizə apardıq", - o əlavə edib.

***

11:17

Bu gün Türkiyədə Dezinformasiyaya Qarşı Mübarizə üzrə Türk Dövlətləri Forumu işini davam etdirir. Forumun ikinci günündə "Ortaq gələcək qurulmasında türk mediası" paneli keçirilir.

Teleqraf-ın Ankaraya ezam olunmuş müxbiri xəbər verir ki, paneldə bir neçə ölkənin rəsmi şəxsləri çıxış edəcəklər.

Daha sonra "Etibarlı məlumat axtarışında yeni nəsil jurnalistika təcrübələri və təsdiq refleksləri" adlı təqdimat keçiriləcək.