BAKI, 28 yanvar. TELEQRAF

"Azərbaycanda yeni nəslin boyu get-gedə azalır. Avropada 21 yaşına çatmış insanların boyu 179, bizdə isə bu rəqəm 162 santimetrdir. Bunun genetik izahı ola bilər. Fakt ondan ibarətdir ki, bizdə əvvəlki illərlə müqayisədə geriləmə var".

Teleqraf xəbər verir ki, bunu Milli Məclisin İnsan hüquqları komitəsinin bu gün keçirilən iclasında yeni hazırlanan “Uşaq hüquqları haqqında” qanun layihəsinin müzakirəsi zamanı deputat Hikmət Məmmədov deyib.

"Təklif edərdim ki, məktəb bufetlərində uşaqlara satılmaq üçün xüsusi menyu hazırlasınlar. Bu menyu həm uşaqların sağlam qidalanması, həm də boy artımı üçün şərait yaratsın. Həmçinin, bu məsələ məktəb ətrafında qida vasitələri satan marketlərə də şamil oluna bilər", - deyə deputat bildirib.

Hikmət Məmmədov həmçinin qeyd edib ki, yeni qanun layihəsinə əsasən, uşağın siyasi təfəkkürünün formalaşdırılmasını qadağan edirik, amma onunla razılaşdırmaqla dini təbliğata icazə veririk: “Valideynin dini bilikləri hansı səviyyədədir ki, uşağa da bunu təbliğ edəcək. Biz sabah-birigün küçədə 7 yaşında hicablı qız uşaqlarını gördükdə, gərək təəccüblənməyək. Belə çıxır, buna icazə veririk”.

Deputatın fikrincə, qanun layihəsində uşaqların birləşmək hüququnun təsbit olunması da düzgün deyil.