BAKI, 2 aprel. TELEQRAF

İlin əvvəlindən əmtəə birjalarında tarixi maksimuma çatan qızılın qiyməti yerli bazarda da dəyişib. Qram qızılın dəyəri artıb. Əyyarlar üzrə qiymətlərin necə dəyişdiyini isə öyrənmək məqasədlə üz tutduq "Moskva" Ticarət Mərkəzinə.

Gündəlik istifadə üçün sərt və davamlılığına görə tələbatın yüksək olduğu 750 əyyar (18k – 75% saf qızıl) 140-150, 585 əyyar (14k - 58.5% saf qızıl) 135 manatdan satılır. 100% saf qızıl olan 999 əyyar qızılın qramı isə 180 manatdır.

Qızıl satışı ilə məşğul olan Nuriyyə Qocayeva bildirdi ki, bu qiymətlər ilin əvvəlindən formalaşıb:

“Mən daha çox 585 əyyarlı (el arasında Türk qızılı deyilir) və 583 əyyarlı (Rus qızılı) satıram. Qızılların hər növündə azı 10-15 manat artım olub. Əvvəlki aylarda qızılın qramını 120-125 manatdan sata bilirdiksə, indiki qiymətlərlə sata bilmirik. Mümkün deyil. Hazırda qızılın qramı 130-135 manatdır. Satışımız çox azdır. Alıcı demək olar ki, yoxdur. Müştərilər qiymətləri görüb, mağazadan qaçırlar”.

Həmsöhbətimiz qeyd edir ki, əvvəlki aylarda günə 5 satış edirdisə, indi günə ancaq 1 satış reallaşdırır.

Digər satıcı Səkinə Pənahova bildirdi ki, bir neçə ay əvvəl 585 əyyarlı qızıl 90 manata satılırdısa, indi qiymətlər 110-120 manatdır.

“Bir neçə ay öncə 110-120 manata satdığımız 750 əyyarlı (İtaliya qızılı) məhsullarımızı indi 140-150 manata satışa qoymuşuq. Qiymətləri eyni olan 585 və 583 əyyarlı qızılları 100-110 manat arasında alıb, 110-120 manat arasında satırıq.Türk qızılı xüsusilə bir ayda qalxıb. Bunun səbəbi Türkiyədə qiymətli metalın dəyərinin bahalaşmasıdır".

Bir haşiyə də çıxaq ki, ötən ay İstanbul Bələdiyyəsinin sədri Əkrəm İmamoğlunun həbsindən sonra ölkədə qram qızılın qiyməti rekord səviyyədə yüksələrək 4.054 lirəyə çatdı. Sonradan bazarda yumşalma olsa da, hazırda qiymətlər 3811 lirə təşkil edir. Bu da bir ayda 0,32% bahalaşma deməkdir.

Zinət əşyalarının çeşidinin çox olduğu "Laçın" Ticarət Mərkəzində isə qiymətlər daha bahadır. 585 əyyarlı qızıl 135, 750 əyyarlı qızıl isə 170 manatdan satılır.

Qiymətlərin "dəvə belinə" çıxdığı bir zamanda müştərilər qızıl almaq fikrindən daşınırlar və bazarda durulma, sabitlik yaranacağı ümidilə gözləmə mövqeyini seçiblər. Yeri gəlmişkən, satıcıların sözlərindən belə məlum oldu ki, alıcılardan fərqli olaraq onlar daha optimistdilər və müştərilərin artan qiymətlərə öyrəşəcəklərini düşünürlər.

Onu da qeyd edək ki, Azərbaycana qızıl Avstraliya, ABŞ, Kanada, Rusiya, İsveçrə, Qazaxıstan və Türkiyədən idxal edilir. Qızılın 1 kiloqramının orta idxal qiyməti 79 min 651 dollar (135 min 406 dollar) təşkil edib ki, bu da illik müqayisədə 37 min 360 dollar (63 min 513 manat) və ya 88,2% çoxdur.