BAKI, 4 aprel. TELEQRAF

Avropa Kanoe Assosiasiyası (ECA) Prezident Kuboku-2025 beynəlxalq reqatasını rəsmi təqvim planına daxil edib.

Azərbaycan Kanoe və Avarçəkmə Federasiyasının mətbuat xidmətindən Teleqraf-a verilən məlumata görə, ECA-nın rəsmi internet səhifəsində reqata haqqında geniş məqalə dərc olunub.

Yazıda iştirakçı komandaların Bakıya gəlişi, açılış mərasimi, yarış və bağlanış günlərindən bəhs edilib.

Təsdiqlənmiş təqvimə əsasən iştirakçı komandalar 2025-ci il aprelin 28-də Bakıya gələcək. Bir gün sonra Mingəçevirdə Prezident Kuboku-2025 beynəlxalq reqatasının rəsmi açılış mərasimi və parad təşkil olunacaq. Aprelin 30-da Suqovuşan su anbarında 1 nəfərlik kayak və kanoe üzrə 200 metr məsafəyə yarışlar keçiriləcək. Reqata 1-2 mayda Mingəçevirdə yerləşən “Kür” Olimpiya Tədris-İdman Mərkəzində (OTİM) davam edəcək. Mayın 2-də yarışların final görüşləri keçiriləcək.

Qeyd edək ki, Prezident Kuboku-2023 və Prezident Kuboku-2024 beynəlxalq reqataları da Avropa Kanoe Assosiasiyasının rəsmi təqvim planına daxil edilmişdi.