BAKI, 5 aprel. TELEQRAF

"Ukraynada münaqişə bitdikdən sonra Avropa İttifaqından rəsmi Kiyevə mümkün hərbi personalın göndərilməsi Avropa ordusunun yaradılması üçün başlanğıc nöqtəsi ola bilər".

Teleqraf xəbər verir ki, bunu Avropa Xalq Partiyasının (APP) rəhbəri Manfred Veber deyib.

Onun fikrincə, bu addım Aİ-nin, o cümlədən ABŞ Prezidenti Donald Trampın hərəkətlərinə məntiqi cavab olar.

Veber həmçinin Almaniyanın gələcək nazirlərini ABŞ-dən silah alışını azaltmağa çağırıb. O qeyd edib ki, Almaniya hökumətinin hərbi ehtiyaclar üçün ayırdığı vəsaitin demək olar ki, 80%-i Amerika məhsullarına xərclənib.

"Bundan sonra avropalı vergi ödəyicilərinin pulları Avropa məhsullarını almaq və Avropada iş yerləri yaratmaq üçün istifadə edilməlidir", - Veber bildirib.

O, həmçinin Aİ-ni vahid raket əleyhinə müdafiə sistemi yaratmağa, birgə peyk müşahidəsini həyata keçirməyə və kibertəhlükəsizliyi təmin etməyə çağırıb.