BAKI, 5 aprel. TELEQRAF

Rusiya ordusu İran istehsalı olan "Şahed" tipli kamikadze dronlarla Ukraynaya hücum edib.

Teleqraf UNİAN.net-ə istinadən xəbər verir ki, dronlar Krivoy Roqda yaşayış məskənlərinə düşüb. Nəticədə bir neçə evdə yanğın baş verib.

Ukrayna Silahlı Qüvvələrinin Komandanlığı Dnepr, Krivoy Roq, Kremençuk və Kropivnitski sakinlərini təhlükəsiz yerlərdə qalmağa çağırıb.

İnsan itkisi barədə məlumat verilmir.

Qeyd edək ki, ötən gün Rusiya ballistik raketlə Krivoy Roqda restoranı vurub. Nəticədə 14 nəfər ölüb, azı 50 nəfər yaralanmışdı. Ukrayna Silahlı Qüvvələri Baş Qərargahının rəsmi bəyanatında qeyd olunub ki, Rusiya daha böyük ərazini yararsız vəziyyətə salmaq və daha çox insanı öldürmək üçün nəzərdə tutulmuş kasetli “İskəndər-M” ballistik raketi ilə şəhərə hücum edib.