BAKI, 5 aprel. TELEQRAF

Britaniya polisi Şotlandiyada ABŞ Prezidenti Donald Trampa məxsus qolf meydançasında vandalizmə yol verdikləri üçün 5 nəfəri həbs edib.

Teleqraf xəbər verir ki, bu barədə "Scottish Sun" qəzeti məlumat yayıb.

Məlumata görə, şübhəlilərdən ikisi ötən gün həbs edilib.

Hadisə Cənubi Ayrşir qraflığındakı Tramp Turnberry kurortunda baş verib. Qolf meydanında qraffit yazıları aşkar edildikdən sonra cinayət işi başlanıb. Polis həbs edilənlərin ümumi sayının 5-ə çatdığını təsdiqləyib, lakin ittihamların təfərrüatı açıqlanmayıb.

Mart ayında da fəallar bu qolf meydançasına ziyan vurublar. Onlar qazonun üzərinə ağ boya ilə üç metr hündürlüyündə “Qəzza satılmır” yazılı lövhə vurub, klub binasını boya ilə ləkələyib, qazonları yararsız hala salıblar.