BAKI, 3 aprel. TELEQRAF

Tacikistan quştingiri güləşi idman növünün Olimpiya Oyunlarının proqramına salınmasını təklif edib.

Teleqraf “Xovar” agentliyinə istinadən xəbər verir ki, bu təkliflə Tacikistan parlamentinin yuxarı palatasının spikeri, paytaxtın meri və Mərkəzi Asiya Futbol Assosiasiyasının prezidenti Rüstəm Emomali çıxış edib.

O, Milli Olimpiya Komitələri Assosiasiyasının (ANOC) baş vitse-prezidenti və Qətər Olimpiya Komitəsinin prezidenti Şeyx Yohan bin Həməd Al Tani ilə Düşənbədə keçirdiyi görüşdə bu fikri səsləndirib.

İlk mərhələdə quştingirinin Asiya Oyunlarına, bundan sonra Olimpiya Oyunlarının proqramına daxil edilməsi təklif olunubdur. Rüstəm Emomali əmin olduğunu bildirib ki, ANOC və Asiya Olimpiya Şurası tezliklə bu ideyanı dəstəkləyəcəklər.

Xatırladaq ki, quştingiri qədim tarixə malik ənənəvi milli tacik güləşidir və müxtəlif mənbələrə görə 3-5 min il əvvələ gedib çıxır. Pəhləvan adlandırılan duel iştirakçıları bir-birilərinin kəmərindən tuturlar, tutuş elementləri xalatın qolu və ya yaxasından da yerinə yetirilə bilər, ayaqların arasından atışlara icazə verilir. Rəqibi kürəyi üstə qoymağı bacaran pəhləvan qalib elan edilir.

Qeyd edək ki, 2022-ci ildə Beynəlxalq Quştingiri Federasiyası İsveçrədə qeydiyyatdan keçib. Ötən ilin avqust-sentyabr aylarında Düşənbədə Rusiya da daxil olmaqla, 60-dan çox ölkə idmançılarının iştirakı ilə quştingiri üzrə ilk dünya çempionatı keçirilib. Tacikistan liderinin mətbuat xidmətinin məlumatına görə, Düşənbədə keçirilən yarış zamanı Rüstəm Emomalinin atası Emomali Rəhmon 62 ölkənin nümayəndələri tərəfindən yekdilliklə bu güləş növü üzrə federasiyanın fəxri prezidenti seçilib.