BAKI, 7 fevral. TELEQRAF

Futbol üzrə U-17 Liqasının XXVI turunda keçirilən “Vətən” - “Neftçi” oyununda baş verənlərlə bağlı AFFA məlumat yayıb.

Teleqraf qurumun mətbuat xidmətinə istinadən xəbər verir ki, hazırda hadisə ilə bağlı araşdırma aparılır.

“AFFA U-17 Liqasında keçirilən “Vətən” – “Neftçi” oyununda təəssüf ki, xoşagəlməz hadisələr baş verib. AFFA olaraq baş verən hadisəni pisləyirik. Hazırda araşdırma aparılır və AFFA İntizam Komitəsinin növbəti iclasında bununla bağlı qərar veriləcək”, - məlumatda deyilir.

Qeyd edək ki, görüşün 69-cu dəqiqəsində ev sahibi komandanın rəsmisi “ağ-qaralar”ın baş məşqçisi Asif Ələsgərovu başla vurub. Tərəflər sonra əlbəyaxa olublar. Nəticədə məşqçinin burnu sınıb. Matç "Neftçi”nin 3:0 hesablı qələbəsi ilə başa çatıb.