BAKI, 8 aprel. TELEQRAF

Bakıda Dənizkənarı Milli Park ərazisində, dənizdən tapılan meyitin kimliyi məlum olub.

Teleqraf-ın əldə etdiyi xəbərə görə, meyit bir neçə gün əvvəl itkin düşmüş 2003-cü il təvəllüdlü Fərid Məmmədova məxsus olduğu müəyyən edilib.

Qeyd edək ki, 22 yaşlı Fərid Məmmədov bu ilin aprelin 1-də işdən çıxıb, lakin evinə gəlməyib.

O, itkin düşmüş kimi axtarılırdı.

***

16:15

Fövqəladə Hallar Nazirliyinin (FHN) "112" qaynar telefon xəttinə Bakı şəhəri, Səbail rayonu, Dənizkənarı Milli Park ərazisində, dənizdən 1 nəfərin meyitinin çıxarılmasına köməklik göstərilməsi üçün müraciət daxil olub.

Nazirlikdən Teleqraf-a verilən məlumata görə, müraciətlə əlaqədar FHN-nin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri cəlb olunublar.

Həyata keçirilən tədbirlər nəticəsində meyit sudan çıxarılaraq aidiyyəti üzrə təhvil verilib.