BAKI, 28 yanvar. TELEQRAF
Azərbaycan Premyer Liqasında mübarizə aparan “Karvan-Yevlax”ın ingiltərəli futbolçusu Samuel Durrant Teleqraf-a müsahibə verib. “Liverpul”un yetirməsi olan 23 yaşlı futbolçu UEFA Çempionlar Liqasının VIII turunda baş tutacaq “Qarabağ”la oyun barədə maraqlı fikirlər səsləndirib:
- Bu gecə UEFA Çempionlar Liqasının əsas mərhələsində “Qarabağ” “Liverpul”la qarşılaşacaq. Bu oyundan gözləntiləriniz nələrdir?
- Düzünü desəm, “Qarabağ” üçün olduqca çətin bir sınaq olacaq. “Liverpul”la səfərdə oynamaq, xüsusilə də Çempionlar Liqasında, həmişə gərgin keçir. Yüksək templi oyun, güclü presinq və orta sahədə böyük mübarizə gözləyirəm. “Qarabağ” texniki cəhətdən yaxşı və nizam-intizamlı komandadır, ona görə də rəqabətli oyun keçəcəyini düşünürəm. Lakin “Liverpul” ilk dəqiqələrdən topa sahib olmağa və qol vəziyyətləri yaratmağa çalışacaq.
- Siz həm də “Liverpul” akademiyasının yetirməsiniz. Bu barədə nə deyə bilərsiniz? Bu komandanı bir çoxlarından daha yaxşı tanıyırsınız…
- Bəli, “Liverpul” akademiyasından keçdiyim üçün uzun illər həmin mühitdə olmuşam. Bu isə klubun mentalitetini və üslubunu dərindən anlamağa kömək edir. Komandanın necə presinq etdiyini, hücumu arxadan necə qurduğunu və Çempionlar Liqası oyunlarına nə dərəcədə ciddi yanaşdıqlarını bilirəm. Beləliklə, bəli, bu komandanı kənardan baxan bir çox insandan daha yaxşı tanıdığımı söyləmək olar.
- Bu gün hansı komandaya azarkeşlik edəcəksiniz?
- Şübhəsiz ki, sona qədər “Liverpul”u dəstəkləyirəm. Bir futbolçu kimi məhz orada yetişmişəm, ona görə də qəlbim onlarladır.
- Hesab proqnozunuzu da bölüşərdiniz.
- Hesab proqnozum “Liverpul”un 3-1 hesablı qələbəsidir, lakin “Qarabağ” əks-hücumda fərqlənsə, buna təəccüblənmərəm; çünki müdafiədə çox ağıllı oynayırlar.
- İki komanda arasındakı oxşar və fərqli cəhətlər hansılardır? Sizcə, “Qarabağ” “Enfild”də hansı çətinliklərlə üzləşəcək?
- Hər iki komanda texniki cəhətdən möhkəmdir, lakin “Liverpul”u fərqləndirən əsas amil onların oyun intensivliyi və heyət dərinliyidir. “Qarabağ” təşkilatlanmış və intizamlıdır, lakin “Enfild” tam başqa bir səviyyədir. Oradakı atmosfer təkbaşına belə rəqibi sıxa bilər. “Qarabağ” üçün ən böyük çətinlik rəqibin sürətinə, presinqinə və azarkeş təzyiqinə tab gətirmək olacaq.
- “Liverpul” son vaxtlar liqada bəzi problemlər yaşayır. Buna baxmayaraq, onların əsas üstünlüklərindən biri doğma meydanda oynamalarıdır. Rəqiblər üçün “Enfild”də oynamaq nə dərəcədə çətindir?
-“Enfild” bir qaladır. Orada oynamaq qorxuludur. Azarkeşlər sanki meydanın içindədir və komanda bu enerjidən qidalanır. İstənilən rəqib üçün bu, sadəcə futbol məsələsi deyil; bu, həm də o səs-küy və təzyiq altında soyuqqanlılığı qoruyub saxlamaq bacarığıdır.
- “Qarabağ”ın növbəti mərhələyə yüksəlmək şansı yüksəkdir. Sizcə, komandanın bu məqsədə çatması üçün əsas faktorlar nə olacaq?
- Əgər “Qarabağ” real şans qazanmaq istəyirsə, müdafiədə yığcam oynamalı, keçidlərdə çevik davranmalı və “Liverpul” boşluq verdikdə onları cəzalandırmalıdır. Psixoloji dözümlülük həlledici rol oynayacaq. Onlar bu möhtəşəm atmosferi idarə etməli, nizam-intizamı qorumalı və əllərinə düşən hər bir şansı qola çevirməyə çalışmalıdırlar.
