BAKI, 4 aprel. TELEQRAF
“Gürcüstan milli komandası yüksəlişdə, Azərbaycan isə enişdədir. Futbolda belə şeylər olur. Biz də uzun müddət enişdə olmuşuq. Baxmayaraq ki, Gürcüstanda xaricdə oynayan çox futbolçu var. Amma indi-indi nəticələr görünür”.
Bu sözləri Teleqraf-a açıqlamasında “Qəbələ”nin baş məşqçisi Kaxaber Tsxadadze deyib.
Gürcüstanlı mütəxəssis Azərbaycan yığmasının martda Haiti (0:3) və Belarusa (0:2) qarşı yoldaşlıq görüşlərində uğursuz nəticələrinə səbəb kimi infrastrukturu göstərib: “Ən önəmli məsələ odur ki, infrastruktur yüksək səviyyədə olmalıdır. Amma ölkədə süni meydançaların sayı çoxdur. Binə stadionunda əla idi. Başqa komandalarda da heç olmasa belə olsa daha yaxşı olar. Milli komandanın nəticələrinin yaxşılaşması üçün infrastruktur vacib amildir. Daha sonra kütləvilik önəmlidir. Yaxşı oyunçular seçilməli və onlar arasında rəqabət olmalıdır. Daha sonra yığmanın nəticələri yaxşılaşmağa başlayacaq”.
Tsxadadze "Qəbələ"nin gənc futbolçusu Şahin Şahniyarovun yığmada debütünə də münasibət bildirib: “Şahinin milliyə dəvət olunması xəbərinə çox sevindim. Burada onun, komanda yoldaşları və məşqçilərinin rolu, əməyi böyük olub ki, ora kimi gedib çıxıb. Onunla fəxr edirəm, sevinirəm ki, mənim futbolçum milliyə çağırılıb. Amma özünə demişəm ki, milliyə getmək bir işdir, amma orada qalmaq daha çətindir. Çalışmalıdır ki, orada qalsın”.
